திருப்பெருமான் ஆண்ட நாயனார் திருக்கோயில்

பத்தாம் நூற்றாண்டு வரிசையில், புதுக்கோட்டை மாவட்டத்தின், குளத்தூர் வட்டத்திலுள்ள நாங்குப்பட்டி கிராமத்தில் அமைந்துள்ள பழமையான சிவாலயம்தான் திருப்பெருமான் ஆண்ட நாயனார் கோயில். இக்கோயில் தற்போது ‘மடத்துக்கோயில்’ என்று அழைக்கப்படுகிறது.

இத்தலத்தில் உள்ள கல்வெட்டுகளால் கி.பி. 10ம் நூற்றாண்டிலேயே இத்தலம் இருந்தது தெரிய வருகிறது. குறிப்பாக முதலாம் பராந்தக சோழன் காலத்தைச் சேர்ந்த கல்வெட்டுகள் இங்கு கண்டறியப்பட்டுள்ளன. பின்னர் முதலாம் குலோத்துங்க சோழன் காலத்திலும் இந்தக் கோயிலுக்கு நில தானங்கள் மற்றும் பல கொடைகள் வழங்கப்பட்டதாக கல்வெட்டுகள் பதிவு செய்கின்றன. இத்தலம் சைவ சமய மரபில் முக்கியத்துவம் பெற்றதாகவும், சோழர் காலத்தில் பக்தி இயக்க வளர்ச்சியுடன் தொடர்புடையதாகவும் கருதப்படுகிறது.

கட்டிட அமைப்பில் கருவறை, அர்த்தமண்டபம் மற்றும் எளிய சோழர் கலை நயத்துடன் கூடிய கல் சிற்பங்கள் காணப்படுகின்றன. காலப்போக்கில் சில பகுதிகள் சேதமடைந்தாலும், இக்கோயில் தொல்லியல் மற்றும் வரலாற்று முக்கியத்துவம் வாய்ந்த தலமாக பார்க்கப்படுகிறது.இத்தலம் சோழர் காலத்தில் ‘மடம்’ சார்ந்த வழிபாட்டு மையமாக இருந்திருக்கலாம் என்று ஆய்வாளர்கள் கருதுகின்றனர். அதனால் இத்தலம் ‘மடத்துக்கோயில்’ என்ற பெயராலும் அறியப்படுகிறது. மேலும், இக்கோயிலில் உள்ள கல்வெட்டுகளில், அக்காலத்தில் இப்பகுதி விவசாய வளமும் சைவ சமயச் செயல்பாடுகளும் செழித்திருந்ததை அறிய முடிகிறது. கோயிலின் கட்டிட வடிவமைப்பில் மிகைப்படுத்தப்பட்ட அலங்காரங்கள் இல்லாமல், எளிமை மற்றும் உறுதியான கல் அமைப்பு முக்கியமாக காணப்படுகிறது. இது ஆரம்ப சோழர் காலக் கோயில்களின் தனிச்சிறப்பாகும்.

பார்க்கும்போது எளிமையாக தோன்றும் இந்தக் கோயில், அதன் ஒவ்வொரு கல்லையும் நெருங்கிப் பார்த்தால் சோழர் கால சிற்பிகளின் அளவற்ற கைவண்ணம், கணிதத் துல்லியம், ஆன்மிக உணர்வு, கற்பனை வளம் ஆகிய அனைத்தையும் ஒன்றாக உணர வைக்கிறது. சோழர் கோயில்களில் காணப்படும் வழக்கமான வடிவமைப்பை விட, இங்கு கற்கள் இணைக்கப்பட்ட விதம், மண்டபங்களின் அமைப்பு, சுவர்களின் தடிப்பு, கருவறையின் அளவியல் ஆகியவை மிகவும் நுணுக்கமாக வடிவமைக்கப்பட்டுள்ளன. ஒரு கல்லை மற்றொரு கல்லுடன் பொருத்திய விதமே இன்று கூட பொறியியல் அதிசயமாக தோன்றுகிறது. சுண்ணாம்புக் கலவையோ, நவீன ஒட்டுப் பொருட்களோ இல்லாமல், கற்களை உயிரோடு இணைத்தது போல அமைத்திருக்கிறார்கள்.

கருவறை பகுதியில் ஒளி, காற்றோட்டம்,சுவர் உயரம் இவை அனைத்தும் வழிபாட்டின் உளவியலை புரிந்துகொண்ட கட்டிடக் கலைஞர்களின் அறிவை வெளிப்படுத்துகின்றன. கருவறையை சுற்றியுள்ள சுவர்களில் செதுக்கப்பட்டிருக்கும் ஒவ்வொரு கோடும் ஒரு அளவியல் ஒழுங்கை பின்பற்றுகிறது.சோழர் காலச் சிற்பங்கள் என்றாலே உயிரோட்டம், தசை அமைப்பு, உடை மடிப்புகள், முகபாவங்கள் ஆகியவற்றில் அசாதாரண நுணுக்கம் இருக்கும். ஆனால், திருப்பெருமான் ஆண்ட நாயனார் கோயிலில் காணப்படும் சில உருவங்கள், அந்த நுணுக்கத்தை மீறி நிற்கின்றன. துவாரபாலகர்களின் கண்கள் கோபத்தையும் காவல் உணர்வையும் வெளிப்படுத்துகின்றன. விரல்களின் வளைவு, கால்களின் நிறுத்தம், மார்பின் உறுதி என எல்லாமே உயிருடன் நிற்பவர்களைப் போல தோன்றுகிறது. நுணுக்கமான கருவிகள் இல்லாதபோதும், கல்லில் நூல் போல மெல்லிய கோடுகளை உருவாக்கியிருப்பது வியப்பை தருகிறது. சில உருவங்களில் உடை மடிப்புகள் காற்றில் அசையும் போலவும், தலைமுடி சுருட்டுகள் இயல்பாக விழும் போலவும் வடிவமைக்கப்பட்டுள்ளன. இது வெறும் கைவினை அல்ல, கல்லுக்குள் உயிரை ஊட்டிய கலை. கோயிலின் அதிஷ்டான அமைப்பும் மிகவும் முக்கியமானது. அடித்தளத்தில் காணப்படும் பத்ம வடிவங்கள், யாழி வரிசைகள், கோட்பட்டைகள் ஆகியவை வெறும் அலங்காரங்களாக இல்லாமல், கட்டிடத்தின் பாரத்தை சமநிலைப்படுத்தும் விதமாகவும் அமைந்துள்ளன. மண்டபத் தூண்களிலும் வடிவங்கள் ஒரே மாதிரியாக இல்லாமல் மலர், யாளிகள், மனித உருவங்கள் என தனித்துவமாக செதுக்கப்பட்டுள்ளன.

இந்தக் கோயிலின் மற்றொரு பெருமை, பெரிய கோபுரங்களோ, உயரமான ராஜகோபுரங்களோ இல்லாமல் இருந்தாலும், அருகில் சென்று பார்க்கும்போது அதன் கலைப்பெருமை மனதை ஆட்கொள்கிறது. திருப்பெருமான் ஆண்ட நாயனார் கோயில் என்பது வழிபாட்டுத் தலம் மட்டுமல்ல, சோழர் காலத்தின் அறிவியல், கணிதம், ஆன்மிகம், சிற்பக்கலை, கட்டிடக்கலை மற்றும் தமிழர்
சிந்தனையின் உயிரோட்டமான சான்றாக நிற்கும் அரிய பொக்கிஷம். திருப்பெருமான் ஆண்ட நாயனார் கோயிலில் நுழையும் போதே கலையின் ஆழத்தை உணர முடியும். குறிப்பாக, வாசலை சுற்றியுள்ள கல் வேலைப்பாடுகள் மிகவும் வித்தியாசமானவை. சாதாரண கோடு அலங்காரங்கள் போல இல்லாமல், ஒன்றோடொன்று பின்னிப்பிணைந்த வடிவங்கள், மெல்லிய பட்டை அமைப்புகள், தாமரை இதழ்களை நினைவூட்டும் செதுக்கல்கள், சுழலும் வடிவங்கள் ஆகியவை மிகவும் நுணுக்கமாக அமைக்கப்பட்டுள்ளன. சில இடங்களில் கற்கள் மர வேலைப்பாடுகளை போலவே தோன்றும் அளவுக்கு மென்மையாக செதுக்கப்பட்டிருக்கும். இந்தக் கோயிலின் மிக விசேஷமான அம்சங்களில் ஒன்று அதன் கட்டுமான அமைப்பு. முழுக் கோயிலும் ஒரு தேரின் வடிவத்தை நினைவூட்டும். அடித்தள அமைப்பு, நீளவாக்கு, சுவர் ஓட்டங்கள், முன்புறம் ஆகியவை சேர்ந்து பார்க்கும்போது, நகரும் தேர் போல ஒரு தோற்றத்தை தருகிறது.

இந்தக் கோயிலின் கல் அமைப்புகளில் ஒளி விழும் விதமும் தனிச்சிறப்பு. திருப்பெருமான் ஆண்ட நாயனார் கோயிலில், பிற சோழர் கோயில்களை போல உயரமான ராஜகோபுரம் இல்லை. ஆரம்ப சோழர் கால கட்டமைப்பைச் சேர்ந்ததால், பின்னர் வந்த பெருங்கோயில்களில் காணப்படும் பலத்த அடுக்குகளுடன் கூடிய பிரம்மாண்ட கோபுர அமைப்பு இங்கு காணப்படாது. கருவறை மற்றும் அதன் மீது எழுந்திருக்கும் விமான அமைப்பிற்கே அதிக முக்கியத்துவம் கொடுக்கப்பட்டுள்ளது. அதனால், கோயிலின் அழகு உள்ளேயுள்ள கல் வேலைப்பாடுகள், மண்டப அமைப்புகள், சிற்ப நுணுக்கங்கள் மற்றும் கட்டிட அளவியலில் காணலாம். இக்கோயிலின் நுழைவுப் பகுதி மிகவும் தாழ்வாக அமைக்கப்பட்டிருக்கிறது. வெளியே சாதாரணமாகத் தோன்றும் இந்தக் கோயில், உள்ளே ‘கல்லுக்குள் மறைந்த கலை உலகம்’ போல காட்சியளிக்கும்.

திலகவதி