காலையில் சுறுசுறுப்பாக எழுந்து நமது பணிகளை தொடங்க வேண்டும். அப்படி தொடங்கினால் அந்தநாள் முழுவதும் சுறுசுறுப்பாக இருக்கும் என்பது மக்களிடம் இருக்கும் ஒரு பொதுவான எண்ண ஓட்டம். ஆனால் இந்த சுறுசுறுப்பை தருவதில் காலையில் நாம் உண்ணும் உணவுக்கும் பங்குள்ளது. அதிலும் குறிப்பாக தானிய உணவுகளை உட்கொள்வதால் உடலுக்கு பல்வேறு நன்மைகள் உள்ளது என்று தொடர்ந்து அறிவுறுத்தி வருகின்றனர் இந்தியாவின் உணவியல் ஆய்வாளர்கள். சமீபத்தில் நடந்த சர்வதேச ஆய்வுகளும் இதனை உறுதி செய்துள்ளது. அதாவது ‘‘நார்ச்சத்து மற்றும் வைட்டமின்களின் சிறந்த மூலமாக இருக்கும் தானியங்களை காலை உணவாக உண்பது ஆரோக்கியத்திற்கு உகந்தது. காலையில் சிறப்பான உணவை உட்கொண்டால், அன்றைய நாளில் கடினமான சூழ்நிலைகளை எதிர்கொள்ளும் சக்தி உடலுக்குக் கிடைக்கும். ஓட்ஸ், மியூஸ்லி, கார்ன் ப்ளேக்ஸ் போன்ற ஆரோக்கியமான உணவுகள் நமது உடல் ஆரோக்கியத்திற்கு போதுமான ஊட்டச்சத்துக்களை வழங்குகின்றன. கோதுமை, அரிசி, ஓட்ஸ், பார்லி, மக்காச்சோளம் ஆகியவை தானிய வகைகளில் முக்கியமானவை. ஒவ்வொரு தானியமும் மூன்று முக்கிய சேர்மங்களைக் கொண்டவை. தானியத்தின் வெளிப்புற அடுக்கில் நார்ச்சத்து, வைட்டமின் பி மற்றும் தாதுக்கள் உள்ளன. மேலும் தானியங்களில் ஸ்டார்ச் மற்றும் புரதங்கள் உள்ளன. அத்துடன், எண்ணெய், வைட்டமின்கள் மற்றும் தாதுக்களும் நிரம்பியுள்ளன என்கின்றனர் ஆய்வாளர்கள்.
இதுகுறித்து உணவு மேம்பாடு சார்ந்த மருத்துவ நிபுணர்கள் மேலும் கூறியதாவது: தானியங்கள் ஒட்டுமொத்த ஆரோக்கியத்திற்கு பங்களிக்கும் அத்தியாவசிய ஊட்டச்சத்துக்களால் நிரம்பியுள்ளன. அவை கார்போஹைட்ரேட்டுகளின் சிறந்த மூலமாக உள்ளது. இது உடலுக்கு ஆற்றலை வழங்குகிறது. குறிப்பாக பி வைட்டமின்களான நியாசின், தியாமின் மற்றும் ரிபோப்ளேவின் போன்றவை ஆற்றல் வளர்சிதை மாற்றத்தில் முக்கிய பங்கு வகிக்கின்றன. மக்காச்சோளம் என்பது ஆக்ஸிஜனேற்றிகள் மற்றும் நார்ச்சத்து நிறைந்தது. பார்லியில் அதிக நார்ச்சத்து மற்றும் செரிமான ஆரோக்கியத்தை மேம்படுத்தும் திறன் உள்ளது. ஓட்ஸ், இதய ஆரோக்கியத்திற்கான குறைந்த கொழுப்ைப ெகாண்டது. கம்பு, கோதுமையை விட அதிக நார்ச்சத்து மற்றும் ஊட்டச்சத்துக்கள் நிறைந்தது. தினை என்பது மெக்னீசியம், பாஸ்பரஸ் மற்றும் ஆன்டிஆக்ஸிடன்ட்கள் நிறைந்த பசையம் இல்லாத தானியம். இப்படி ஒவ்வொரு சிறு தானியத்திலும் மனித உடலுக்கு தேவையான ஒரு நன்மை உள்ளது. இதுபோன்ற தானியங்களை தினசரி உணவில் சேர்த்துக் கொள்வது பல ஆரோக்கிய நன்மைகளை வழங்குகிறது.
தானியங்கள் ஒரு சீரான உணவின் இன்றியமையாத பகுதியாகும் மற்றும் நமது ஒட்டு மொத்த நல்வாழ்வுக்கு தேவைப்படும் ஊட்டச்சத்துக்கள் இவற்றில் ஏராளமாக உள்ளன. தானியங்களில் அத்தியாவசிய வைட்டமின்கள், தாதுக்கள் மற்றும் நார்ச்சத்து ஆகியவை நிரம்பியுள்ளன. அவற்றில் தியாமின், நியாசின் மற்றும் போலேட் போன்ற பி வைட்டமின்கள் உள்ளன. இந்த வைட்டமின்கள் நரம்பு மண்டலத்தை ஆரோக்கியமாக பராமரிப்பதிலும், உணவை ஆற்றலாக மாற்றுவதிலும், செல் செயல்பாட்டை ஆதரிப்பதிலும் முக்கிய பங்கு வகிக்கின்றன. பல்வேறு உடல் செயல்பாடுகளுக்கு தேவையான இரும்பு, மக்னீசியம் மற்றும் செலினியம் போன்ற தாது பொருட்களையும் தானியங்கள் வழங்குகின்றன.
தானியங்களில் வைட்டமின்கள் மற்றும் தாதுக்கள் நிறைந்திருப்பதால், அவை அனைத்து ஊட்டச்சத்துக்களையும் வழங்க போதுமானதாகக் கருதப்படுகின்றன. ஊட்டச்சத்து குறைபாடு உள்ளவர்களும் தானியங்களை காலை உணவில் சேர்த்துக் கொள்ளலாம். தானியங்கள் கார்போஹைட்ரேட்டுகளின் சிறந்த மூலமாகும். அவை உடலின் முதன்மை ஆற்றல் மூலமாகும். எனவே ஒரு கிண்ணம் தானியத்துடன் உங்கள் நாளைத் தொடங்குவது, உங்கள் காலைச் செயல்பாடுகளின் மூலம் ஆற்றலுக்குத் தேவையான எரிபொருளை வழங்குகிறது. முழு தானியங்களில் உள்ள மெதுவாக வெளியிடும் கார்போஹைட்ரேட்டுகள் நாள் முழுவதும் நீடித்த ஆற்றல் அளவை உறுதி செய்கின்றன. எனவே காலை உணவாக சிறுதானியங்களை உட்கொள்ளும் போது மனித உடலின் சுறுசுறுப்பு அதிகரிக்கும் என்பதும் உறுதி செய்யப்பட்டுள்ளது. இவ்வாறு மருத்துவ நிபுணர்கள் கூறினர்.
கிடைக்கும் பலன்கள்
1) செரிமான ஆரோக்கியம்: தானியங்கள் கரையக்கூடிய மற்றும் கரையாத நார்ச்சத்தின் சிறந்த மூலமாகும். நார்ச்சத்து சீரான குடல் இயக்கங்களை ஊக்குவித்து மலச்சிக்கலைத் தடுத்து உங்கள் செரிமான அமைப்பை ஆரோக்கியமாக வைத்திருக்க உதவுகிறது. இது கொலஸ்ட்ரால் அளவை கட்டுப்படுத்தவும், வயிறு நிறைந்த உணர்வை ஏற்படுத்தவும் உதவுவதால் எடை மேலாண்மைக்கு பெரிதளவில் நல்லது.
2) இதய ஆரோக்கியம்: தினசரி முழு தானியங்களை உட்கொள்வதால் இதய ஆரோக்கியம் மேம்படுவதாக சொல்லப்படுகிறது. தானியங்களில் உள்ள நார்ச்சத்து, ஆக்ஸிஜனேற்றிகள் மற்றும் தாவரக் கலவைகள் ஆரோக்கியமான ரத்த அழுத்தத்தை பராமரிக்கவும், கெட்ட கொழுப்பின் அளவை குறைத்து இதயம் தொடர்பான நோய்களின் அபாயத்தைக் குறைக்கவும் உதவுகின்றன.
3) எடை மேலாண்மை: உடல் எடையைக் குறைக்க விரும்புபவர்கள் உணவில் தானியங்களை சேர்த்துக்கொள்வது நல்லது. முழு தானியங்கள் பொதுவாகவே சுத்திகரிக்கப்பட்ட தானியங்களை விட வயிறு நிரம்பிய உணர்வை ஏற்படுத்துகின்றன. இது அதிக கலோரி எடுத்துக்கொள்வதை குறைக்க உதவுகிறது. அவற்றின் நார்ச்சத்து, செரிமானத்தை மெதுவாக்கி நீண்ட நேரத்திற்கு திருப்தியாக உணர வைக்கிறது. இதனால் அதிகமாக உணவு உட்கொள்வது தடுக்கப்படுகிறது.
4) அதிக ஆற்றல்: தானியங்கள் கார்போஹைட்ரேட்டுகளின் சிறந்த மூலமாகும். அவை உடலுக்கு தேவையான ஆற்றலை வழங்குகிறது. முழு தானியங்களை உட்கொள்வதால் நாள் முழுவதும் தேவையான ஆற்றலை வழங்குகிறது. இது உடல் மற்றும் மன செயல்திறனை அதிகரித்து நம்மை சிறப்பாக வைத்திருக்க உதவுகிறது.
90 சதவீதம் பேருக்கு நார்ச்சத்து குறைபாடு
ஆரோக்கியத்திற்கு தேவையான அளவு வைட்டமின்கள் உணவில் இருந்து மட்டுமே கிடைத்துவிடாது. உதாரணமாக, சைவம் அல்லது வீகன் உணவு முறையை பின்பற்றுபவர்களுக்கு வைட்டமின் பி12 குறைபாடு இருக்கும். பால் குடிக்காதவர்களுக்கு போதுமான அளவு கால்சியம் மற்றும் வைட்டமின் டி கிடைப்பதில்லை. அதேபோல, வயதாகும்போது, சில ஊட்டச்சத்துக்களை உறிஞ்சும் திறன் பலவீனமடைகிறது.
இதனால் ஊட்டச்சத்து குறைபாடு ஏற்படும் அபாயம் அதிகரிக்கும். பெரும்பாலான குழந்தைகள் மற்றும் இளம் பருவத்தினருக்கு போதுமான ஊட்டச்சத்துக்கள் கிடைக்காமல் இருப்பதற்கு செறிவூட்டப்பட்ட உணவுகள் இல்லாததும் ஒரு காரணம். கலப்பு தானியங்கள் கொண்ட காலை உணவுகளில் நார்ச்சத்து நிறைந்திருக்கும். நமது வயிற்றில் நல்ல பாக்டீரியாக்களை அதிகரிக்கும் ஊட்டச்சத்து இது. ஆனால் 90 சதவீத மக்களுக்கு நார்ச்சத்து குறைபாடு உள்ளதும் ஆய்வில் கண்டறியப்பட்டுள்ளது.
