புதுடெல்லி: கிரிக்கெட் வீரர் யுஸ்வேந்திர சஹால் தன்னிடம் இன்ஸ்டாகிராமில் வழிந்ததாக நடிகை தானியா சாட்டர்ஜி ஆதாரத்துடன் புகாரளித்துள்ளது பெரும் பரபரப்பை ஏற்படுத்தியுள்ளது. இந்திய கிரிக்கெட் அணியின் முன்னணி சுழற்பந்து வீச்சாளர் யுஸ்வேந்திர சஹால் (35), தற்போது பஞ்சாப் கிங்ஸ் அணிக்காக ஐபிஎல் 2026 தொடரில் விளையாடி வருகிறார். கடந்த மார்ச் 31ம் தேதியன்று குஜராத் டைட்டன்ஸ் அணிக்கு எதிரான போட்டியில் இவர் 2 விக்கெட்டுகளை வீழ்த்தி சிறப்பான ஆட்டத்தை வெளிப்படுத்தினார்.
இதற்கிடையே, சஹால் மற்றும் அவரது மனைவி தனஸ்ரீ வர்மா ஆகியோருக்கு கடந்த 2025ம் ஆண்டே விவாகரத்து ஆகிவிட்டதாக தகவல்கள் வெளியாகி வருகின்றன. இந்த தனிப்பட்ட வாழ்க்கை குறித்த விவாதங்களுக்கு மத்தியில், தற்போது புதிய சர்ச்சை வெடித்துள்ளது. ‘காந்தி பாத்’ உள்ளிட்ட பல்வேறு வெப் தொடர்களில் நடித்து பிரபலமான நடிகை தானியா சட்டர்ஜி (31), நேற்று மீடியாவிடம் பேசுகையில் அதிரடி புகார் ஒன்றை தெரிவித்தார். அதில், சஹால் தனது இன்ஸ்டாகிராம் பக்கத்திற்கு நேரிடையாக குறுஞ்செய்தி அனுப்பியதாகக் கூறி, தனது செல்போன் ஸ்கிரீன் ஷாட்டை கேமராக்கள் முன் காட்டினார்.
அந்த செய்தியில், ‘நீங்க ரொம்ப கியூட்டா இருக்கீங்க’ என்று சஹால் குறிப்பிட்டிருந்ததாக அவர் தெரிவித்துள்ளார். இந்த விவகாரம் குறித்து சஹால் தரப்பில் இதுவரை எந்த விளக்கமும் அளிக்கப்படவில்லை. பிரபல கிரிக்கொட் வீரரின் இந்த செயல் சமூக வலைதளங்களில் விவாத பொருளாக மாறியுள்ளது.
