விஜய்யின் தேர்தல் வாக்குறுதி குறித்து அவரிடம் தான் கேட்க வேண்டும்: எடப்பாடி பழனிசாமி டென்ஷன்

சேலம்: தவெக தலைவர் விஜய் அளித்துள்ள தேர்தல் வாக்குறுதிகள் குறித்து அவரிடம் தான் கேட்க வேண்டும் என எடப்பாடி பழனிசாமி கூறினார். சர்வதேச மகளிர் தினம் இன்று கொண்டாடப்படுகிறது. இதையொட்டி அதிமுக பொதுச்செயலாளர் எடப்பாடி பழனிசாமி சேலம் நெடுஞ்சாலை நகரில் தனது இல்லத்தில் மகளிரணியினர் ஏற்பாடு செய்திருந்த கேக்கை வெட்டினார். பின்னர் மகளிரணி நிர்வாகிகளுக்கு மகளிர் தின வாழ்த்துக்களை தெரிவித்தார்.

அப்போது அவரிடம் இலவசங்களை வழங்ககூடாது என தெரிவித்த தவெக தலைவர் விஜய் தற்போது தேர்தல் வாக்குறுதிகளில் இலவசங்கள் அறிவித்துள்ளது குறித்து செய்தியாளர்கள் கேள்வி எழுப்பினர். அதற்கு பதில் அளித்த எடப்பாடி பழனிசாமி, ஒவ்வொரு கட்சித் தலைவர்களும் அவர்களின் விருப்பப்படி தேர்தல் அறிவிப்புகளை வெளியிடுகிறார். அதன் அடிப்படையில் தமிழக வெற்றி கழகத்தின் தலைவர் விஜயையும் தேர்தல் அறிக்கை வெளியிட்டுள்ளார். அதுகுறித்து அவரிடம் தான் கேட்க வேண்டும்.
அதிமுக சார்பாக நிறைய அறிவிப்புகள் கொடுக்கப்பட்டுள்ளது.

அதிமுக ஆட்சிக்கு வந்தவுடன் ஒவ்வொரு குடும்ப அட்டைதாரர்களுக்கும் ரூ.2000 வங்கிக் கணக்கில் செலுத்தப்படும். 5 லட்சம் பெண்களுக்கு ஸ்கூட்டர் வாங்க ரூ. 25 ஆயிரம் மானியம் கொடுக்கப்படும் என்றார். ஓமலூர் தொகுதி முன்னாள் பாமக எம்எல்ஏ தமிழரசு இன்று தனது ஆதரவாளர்களுடன் எடப்பாடி பழனிசாமி முன்னிலையில் அதிமுகவில் இணைந்தார்.