மூளைச்சாவு அடைந்த இனைஞரின் பிற உறுப்புகளும் தானம்: திருச்சியில் இருந்து சென்னைக்கு ஹெலிகாப்டரில் வந்த இதயம்

சென்னை: திருச்சியில் இருந்து சென்னைக்கு ஹெலிகாப்டர் மூலம் இதயம் கொண்டுவரப்பட்டது. மருத்துவ அவசரம் மற்றும் ஒருங்கிணைந்த முயற்சியின் ஒரு குறிப்பிடத்தக்க நிகழ்வாக, அவசர மாற்று அறுவை சிகிச்சைக்காக உயிருள்ள மனித இதயம் உலங்கு வானூர்தி (Helicopter) மூலம் தமிழ்நாடு முழுவதும் பல இடங்களைக் கடந்து சென்னைக்குக் கொண்டு வரப்பட்டது. உயிர்காக்கும் இந்த உறுப்பு முதலில் தஞ்சாவூர் எம்.ஜி.எம் (MGM) மருத்துவமனையிலிருந்து திருச்சி எம்.ஜி.எம் மருத்துவமனைக்குக் கொண்டு செல்லப்பட்டது. அங்கிருந்து, மிக முக்கியமான மருத்துவ நேரமான ‘பொன்னான நேர’ (Golden Hour) விதிகளின்படி, தகுந்த நேரத்தில் மருத்துவ சிகிச்சை அளிப்பதை உறுதி செய்வதற்காகத் திருச்சியிலிருந்து சென்னைக்கு உலங்கு வானூர்தி மூலம் கொண்டு வரப்பட்டது.

தானமாகப் பெறப்பட்ட இதயத்தைச் சுமந்து வந்த உலங்கு வானூர்தி, சென்னை அரும்பாக்கத்தில் உள்ள டி.ஜி. வைணவக் கல்லூரி வளாகத்தில் மதியம் 3.45 மணியளவில் பாதுகாப்பாகத் தரையிறங்கியது. இதயத்தை விரைவாகக் கொண்டு செல்வதற்கு ஏதுவாக இக்கல்லூரி வளாகம் ஒரு முக்கியமான தரையிறங்கு தளமாக (Landing Zone) செயல்பட்டது. கல்லூரி நிர்வாகம் மற்றும் காவல்துறையினரின் ஒருங்கிணைப்புடன் மிகக் குறுகிய காலத்தில் அங்கு வானூர்தி இறங்குதள வசதிகள் மற்றும் பாதுகாப்பு ஏற்பாடுகள் சிறப்பாகச் செய்யப்பட்டிருந்தன. தரையிறங்கிய உடனேயே, இதயம் மருத்துவக் குழுவிடம் ஒப்படைக்கப்பட்டு, அவசர மாற்று அறுவை சிகிச்சைக்காகச் சென்னையில் உள்ள எம்.ஜி.எம். மருத்துவமனைக்கு ‘பசுமை வழித்தடத்தில்’ (Green Corridor) அவசர கால ஊர்தி (Ambulance) மூலம் உடனடியாகக் கொண்டு செல்லப்பட்டது.

இந்த உறுப்புத் தானம் செய்தவர் தஞ்சாவூரைச் சேர்ந்தவர். இதனைப் பெறுபவர் கடும் இதயச் செயலிழப்பு பாதிப்புக்குள்ளான கோவாவைச் சேர்ந்த 30 வயது நோயாளி ஆவார். டிஜி வைணவக் கல்லூரியில் உலங்கு வானூர்தி அவசரமாகத் தரையிறங்குவதற்கான முழு நடவடிக்கைகளும், கல்லூரியின் செயலர் திரு. அசோக் குமார் முந்த்ரா, முதல்வர் முனைவர் சந்தோஷ் பாபு மற்றும் எம்.ஜி.எம் மருத்துவமனையின் உறுப்பு மாற்று ஒருங்கிணைப்புக் குழுவினரால் வழங்கப்பட்ட கடுமையான மருத்துவ மற்றும் பாதுகாப்பு நெறிமுறைகளின் கீழ், தடையற்ற தொடர் சிகிச்சையை உறுதி செய்யும் வகையில் மேற்கொள்ளப்பட்டன.

மருத்துவ அவசர காலங்களில் சமூகப் பொறுப்புணர்வுடன் செயல்பட்டு, தனது மைதானத்தை ஹெலிபேடாகப் பயன்படுத்த அனுமதி அளித்த வைணவக் கல்லூரி நிர்வாகம், ஊழியர்கள் மற்றும் மாணவர்கள்தங்களின் மனிதாபிமானத்தை வெளிப்படுத்தியுள்ளனர். இந்தச் சரியான நேர உதவி, நிறுவனத்தின் வலுவான சமூகப் பொறுப்புணர்வையும் மனிதாபிமானப் பணிகளுக்கான அர்ப்பணிப்பையும் பிரதிபலிக்கிறது.