அந்தமான் அருகே காற்றழுத்த தாழ்வுப்பகுதி தமிழ்நாட்டில் இரண்டு நாட்களுக்கு மழை பெய்யும்: வானிலை ஆய்வு மையம் அறிவிப்பு

சென்னை: அந்தமான் அருகே நிலை கொண்டுள்ள காற்றழுத்த தாழ்வுப்பகுதி காரணமாக தமிழகத்தில் இரண்டு நாட்களுக்கு மழை பெய்யும் என்று வானிலை ஆய்வு மையம் தெரிவித்துள்ளது. அந்தமான் மற்றும் மலேசியாவுக்கு இடைப்பட்ட வங்கக் கடல் பகுதிக்கு வந்த காற்றழுத்த தாழ்வு நிலை வட இலங்கை அருகே நீடித்துக் கொண்டு இருக்கிறது. இந்த நிகழ்வின் காரணமாக தமிழகத்தில் காற்று குவிதல் ஏற்பட்டுள்ளது. நேற்று இரவில் முல்லைத் தீவு, கிளிநொச்சி, காங்கேசன்துறை, தலைமன்னார் வரையில் மழை பெய்து கொண்டு இருக்கிறது. இது நேற்றும் பெய்தது.

தமிழகத்தை பொருத்தவரையில் ராமநாதபுரம், புதுக்கோட்டை, தஞ்சாவூர், புதுச்சேரி, விழுப்புரம், கள்ளக்குறிச்சி, திருவண்ணாமலையின் கிழக்கு பகுதி, செங்கல்பட்டு, சென்னை, திருவள்ளூர், அரியலூர் பெரம்பலூர், திருச்சி என அனைத்து பகுதிகளில் நேற்று மழை பெய்தது. நேற்று மதியத்துக்கு பிறகு மேற்கு பகுதியிலும் கர்நாடகா வரையிலும் பெய்தது. அதன் தொடர்ச்சியாக சென்னையில் நேற்று காலை முதல் லேசான மழை பெய்தது. தென் மாவட்டங்களிலும் மழை பெய்யும் வாய்ப்புள்ளது. குறிப்பாக 150 மிமீ வரை பெய்யும் என்றும் எதிர்பார்க்கப்படுகிறது.

காற்றின் திசை மாற்றம் காரணமாக தெற்கு நோக்கி செல்லும் வாய்ப்பும் உள்ளதால், தமிழ்நாட்டில் பரவலாக பெய்யும் வாய்ப்பும் உள்ளது. பெரும்பாலும் எல்லா மாவட்டங்களிலும் பெய்யும் வாய்ப்பும் உள்ளது. ஓரிரு இடங்களில் கனமழை பெய்யும் வாய்ப்பும் உள்ளது. குறிப்பாக தென் மாவட்ட மேற்கு தொடர்ச்சி மலைப்பகுதிகளில் பெய்யும் என்றும் எதிர்பார்க்கலாம். இன்றும் கடலோர பகுதிகளில் அடிக்கடி மழை பெய்யும். குறிப்பாக டெல்டாவில் பெய்யும் வாய்ப்பும் உள்ளது. தஞ்சாவூர், திருவாரூர், காரைக்கால், மயிலாடுதுறை, சிதம்பரம், புவனகிரி, சேத்தியாதோப்பு மணல்மேடு பகுதிகளிலும் மழை பெய்யும். கன்னியாகுமரி மாவட்டம் பகுதிகளிலும் ஓரிரு இடங்களில் மழை பெய்யும் வாய்ப்புள்ளது.

தென்தமிழகத்தில் ஒரு சில இடங்களிலும், வட தமிழகத்தில் ஓரிரு இடங்களிலும் இடி, மின்னலுடன் கூடிய லேசானது முதல் மிதமான மழை இன்று முதல் 19ம் தேதி வரை பெய்யும் வாய்ப்புள்ளது. இருப்பினும், கிழக்கு திசை மற்றும் வடக்கில் இருந்து வரும் குளிர் காற்றின் காரணமாக குளிர் மற்றும் பனி மூட்டம் நீடிக்கும் வாய்ப்பும் உள்ளது. மேலும், சென்னையில் இன்று வானம் ஓரளவுக்கு மேகமூட்டத்துடன் காணப்படும். நகரின் ஒருசில இடங்களில் லேசானது முதல் மிதமான மழை பெய்யும் வாய்ப்பும் உள்ளது.