2021-22 நிதியாண்டில் பாஜகவுக்கு கிடைத்துள்ள வருமானம் ரூ.1,912 கோடி :ஜனநாயக சீர்திருத்தங்களுக்கான அமைப்பு தகவல்!!

டெல்லி : 2021-22 நிதியாண்டில் பாஜகவுக்கு கிடைத்துள்ள வருமானம் ரூ.1,912 கோடி என ஜனநாயக சீர்திருத்தங்களுக்கான அமைப்பு தெரிவித்துள்ளது. நமது நாட்டில் மொத்தம் 8 அரசியல் கட்சிகள், தேசிய கட்சிகளாக தேர்தல் ஆணையத்தால் அங்கீகரிக்கப்பட்டவை ஆகும். அவை, பாஜக., காங்கிரஸ், பகுஜன் சமாஜ், தேசியவாத காங்கிரஸ் கட்சி, இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சி, திரிணாமுல் காங்கிரஸ், தேசிய மக்கள் கட்சி ஆகும்.

இந்த நிலையில், கொல்கத்தாவைச் சேர்ந்த ஜனநாயக சீர்திருத்த சங்கம் 8 தேசிய கட்சிகள் தேர்தல் ஆணையத்திடம் தாக்கல் செய்த  2021-22-ம் ஆண்டுக்கான வரவு மற்றும் செலவு குறித்த தகவல்களை சேகரித்து அறிக்கையாக வெளியிட்டுள்ளது. அதன்படி 8 தேசிய கட்சிகளின் ஓராண்டு ஒட்டு மொத்த வருவாய் ரூ.3,289.34 கோடி என்றும் பாஜகவின் ஓராண்டு வருவாய் மட்டும் ரூ.1917.12 கோடி என்றும் தெரிவிக்கப்பட்டுள்ளது.

8 தேசிய கட்சிகளின் மொத்த வருமானத்தில் பாஜகவின் வருமானம் மட்டும் பாதிக்கும் மேல் என்பது குறிப்பிடத்தக்கது. இந்தத் தொகையில் ரூ.854.46 கோடி செலவிடப்பட்டுள்ளதாக பாஜக. தெரிவித்துள்ளது. 2020 -2021ம் நிதி ஆண்டில் பாஜகவின் வருவாய் ரூ.752 ஆக இருந்த நிலையில், 2021 -2022 நிதி ஆண்டில் 154% அதிகரித்துள்ளது. இரணடாம் இடத்தில் உள்ள திரிணாமுல் காங்கிரஸ் கட்சியின் வருமானம் ரூ.545.74 கோடி ஆகும். இந்தக் கட்சி செலவு செய்துள்ள தொகை ரூ. 268.33 கோடி. 3ம் இடத்தில் உள்ள காங்கிரஸ் கட்சியின் வருமானம் ரூ.541.27 கோடி ஆகும். செலவு ரூ.400.41 கோடி ஆகும். வருமானத்தில் 73.98 சதவீதத்தை காங்கிரஸ் கட்சி செலவு செய்துள்ளது.

8 அரசியல் கட்சிகள் மொத்த வருமானத்தில் 55.09 சதவீதம், அதாவது ரூ.1,811.94 கோடி, தேர்தல் பத்திரங்கள் மூலம் வந்த நன்கொடை ஆகும். தேர்தல் பத்திரங்கள் மூலம் பாஜகவுக்கு ரூ.1,033.70 கோடியும், திரிணாமுல் காங்கிரசுக்கு ரூ.528.13 கோடியும், காங்கிரஸ் கட்சிக்கு ரூ.236.09 கோடியும், தேசியவாத காங்கிரசுக்கு ரூ.14 கோடியும் கிடைத்துள்ளது.பிற நன்கொடை வாயிலாக அரசியல் கட்சிகளுக்கு கிடைத்துள்ள நன்கொடை என பார்த்தால், பாஜகவுக்கு ரூ.1,775.43 கோடியும், திரிணாமுல் காங்கிரஸ் ரூ.582.52 கோடியும், காங்கிரசுக்கு ரூ.347.99 கோடியும், தேசியவாத காங்கிரஸ் கட்சி ரூ.71.95 கோடியும், மார்க்சிஸ்ட் கம்யூனிஸ்டு கட்சி ரூ.65.87 கோடியும் கிடைத்துள்ளன.