அவதார் 3, 4வது பாகங்கள் வருவது சந்தேகம்: ஜேம்ஸ் கேமரூன் தகவல்

லாஸ்ஏஞ்சல்ஸ்: அவதார் படத்தின் 3வது மற்றும் 4வது பாகங்கள் வெளியாவது சந்தேகம்தான் என ஜேம்ஸ் கேமரூன் கூறியுள்ளார். 2009ம் ஆண்டு வெளியான ஹாலிவுட் படம் அவதார். அனிமேஷன் கலந்த படமாக இது உருவாகியிருந்தது. இந்த படத்தின் அனிமேஷன் காட்சிகள் உலகப் புகழ் பெற்றவை. இதனால் பல படங்களின் பாக்ஸ் ஆபீஸ் சாதனைகளை இந்த படம் முறியடித்தது. இதையடுத்து இந்த படத்தின் 2வது, 3வது, 4வது பாகங்கள் வெளியாகும் என அறிவிக்கப்பட்டது. முதல் பாகம் வெளியாக 13 ஆண்டுகள் கழிந்துவிட்டது. இந்நிலையில் இந்த படத்தின் 2வது பாகம் வரும் டிசம்பர் மாதம் 16ம் தேதி வெளியாகும் என அறிவிக்கப்பட்டுள்ளது.

சமீபத்தில் படத்தின் டிரெய்லரும் வெளியிடப்பட்டது. இந்த படம் குறித்து படத்தின் இயக்குனர் ஜேம்ஸ் கேமரூன் கூறியது: கடந்த 13 ஆண்டுகளில் 2, 3, 4 பாகங்களுக்கான அனிமேஷன் பணிகள் நடந்து வந்தன. இதில் 2வது பாகத்துக்கு மட்டும் 3 ஆண்டுகள் செலவழித்துள்ளோம். வரப்போகும் 3 ஆண்டுகளில் 3வது 4வது பாகங்களை வெளியிட திட்டமிட்டிருந்தோம். ஆனால் இப்போது அந்த பாகங்கள் வெளியாகுமா என சந்தேகம் ஏற்பட்டுள்ளது. இதற்கு முக்கிய காரணம், மக்களிடம் ஏற்பட்டுள்ள மாற்றம்தான். கொரோனா என்ற கொடுமையான பாதிப்பு ஏற்படும் என நாங்கள் யாருமே நினைக்கவில்லை. அது வந்த பிறகு ஒட்டுமொத்த சினிமா உலகமும் தலைகீழாக மாறியுள்ளது. ஓடிடியின் தாக்கம் பெருகிவிட்டது. உலகம் முழுவதும் தியேட்டர்களுக்கு வரும் மக்களின் எண்ணிக்கை குறைந்துவிட்டது.

பல நாடுகளில் இப்போது கொரோனா அச்சம் நீங்கியுள்ளது. ஆனால் கடந்த 3 வருடமாக ஓடிடிக்கு மாறிவிட்ட பலர், தியேட்டர் பக்கம் வருவதில்லை. தியேட்டர்களுக்கு அவர்களை அழைத்து வர படாதபாடு பட வேண்டியிருக்கிறது. அவதார் 2 படம் வசூலில் சாதனை புரிய வேண்டும். அப்போதுதான் எங்களுக்கு லாபம் கிடைக்கும். இல்லாவிட்டால் பெரும் நஷ்டத்தை சந்திப்போம். 3வது 4வது பாகம் வருவதும் கைவிடப்படும்.