கீழடி அருங்காட்சியகம் ஆகஸ்ட் மாதம் திறப்பு: அமைச்சர் எ.வ.வேலு தகவல்

திருப்புவனம்: கீழடி அருங்காட்சியப் பணிகள் நிறைவடைந்ததும் ஆக்ஸ்ட் மாதம் முதல்வர் மு.க.ஸ்டாலின் அருங்காட்சியகத்தை திறந்து வைக்க உள்ளதாக அமைச்சர் எ.வ.வேலு தெரிவித்துள்ளார். கீழடியில் ரூ.11 கோடியே மூன்று லட்சம் செலவில் 100 கட்டிடங்களுடன் அருங்காட்சியகம் கட்டுமான பணிகள் நிறைவடைந்துள்ளது. கட்டிடங்களில் விளக்குகள், மரங்கள் உள்ளிட்டவைகள் வைத்து அழகுபடுத்தும் பணி நடந்து வருகிறது. விரைவில் கீழடி அருங்காட்சியகம் பார்வையாளர்கள் பார்வைக்கு திறக்கப்பட உள்ள நிலையில், பொதுப்பணித்துறை மற்றும் நெடுஞ்சாலைத்துறை அமைச்சர் எ.வ. வேலு, தொழில் மற்றும் தமிழ் வளர்ச்சித்துறை அமைச்சர் தங்கம் தென்னரசு, சு.வெங்கடேசன் எம்பி. தமிழக அரசின் முதன்மை செயலர் உதயசந்திரன் உள்ளிட்டோர் நேற்று ஆய்வு மேற்கொண்டனர்.

தமிழக தொல்லியல் துறை சார்பில் இதுவரை நடத்தப்பட்ட நான்கு கட்ட அகழாய்விலும் தங்க பொருட்கள், தந்த பொருட்கள், சுடுமண் பொருட்கள், விளையாட்டு பொருட்கள், இரும்பு பொருட்கள், சுடுமண் பானைகள், எலும்புகள், முதுமக்கள் தாழிகள் என 20 ஆயிரத்திற்கும் மேற்பட்ட பொருட்கள் கண்டெடுக்கப்பட்டுள்ளன. இந்த தொல்பொருட்களை சுற்றுலா பயணிகள் பார்வையிட தனித்தனி கட்டிடங்கள் கட்டப்பட்டு வருகின்றன. கீழடி அகழாய்வு உள்ளிட்டவைகள் பற்றிய ஒலி, ஒளி காட்சிக்கு என தனியாக அரங்கமும் கட்டப்பட்டுள்ளது. இவற்றை எல்லாம் ஆய்வு செய்த அமைச்சர்கள் செய்ய வேண்டிய மாறுதல்கள் குறித்து பொதுப்பணித்துறை அதிகாரிகளுக்கு தெரிவித்தனர்.

பின்னர் அமைச்சர் எ.வ.வேலு கூறுகையில், உலக தரம் வாய்ந்த அருங்காட்சியகம் இது. எனவே பொருட்களை காணவரும் பார்வையாளர்களுக்கு ஆர்வம் ஏற்படுத்த வேண்டும். பொருட்களை காட்சிப்படுத்த உலக அளவிலான ஒளி அமைப்புடன் விளக்குகள் ஏற்படுத்த வேண்டும். பொருட்களின் தன்மைக்கு ஏற்றவாறு லைட் செட்டிங் செய்ய வேண்டும். மற்ற தளங்கள் எல்லாம் ஐந்து மணிக்கே பார்வையாளர் நேரம் முடிந்து விடும். ஆனால் கீழடி அருங்காட்சியகம் மட்டும் இரவு 8 மணி வரை செயல்பட வேண்டும். வரும் ஆகஸ்ட் மாதத்திற்குள் பணிகளை முடித்து முதல்வர் மு.க. ஸ்டாலின் நேரில் வந்து அருங்காட்சியகத்தை திறந்து வைக்க உள்ளார். எனவே  கூடுதல் கவனம் செலுத்தி பணிகள் நடந்து வருகின்றன. பார்வையாளர்களுக்கு விளக்கமளிக்க (கைடு) தேர்ச்சி பெற்றவர்களை நியமிக்க வேண்டும் என அதிகாரிகளிடம் தெரிவித்தார்.