அரசுத் துறைகள் கணினியில் யூனிகோட் பயன்படுத்தலாம்: தலைமைச் செயலாளர் கடிதம்

சென்னை: அரசு மற்றும் அரசு சார்ந்த துறைகளில் பயன்படுத்தப்படும் கணினிகளில் ‘‘ தமிழ் யூனிகோட்’’ எழுத்துருக்களை பயன்படுத்த வசதியாக இலவச தமிழ் யூனிகோட் அனைத்து வகை குறியமைவு (Tamil Unicoge Tamil All Character Encoding)க்கு அரசு அனுமதி அளித்துள்ளதால், அரசு துறையை சார்ந்தவர்கள் இந்த மென்பொருளை இலவசமாக பதிவிறக்கம் செய்து கொள்ளலாம் என்றும் தெரிவித்துள்ளது. இது குறித்து அரசுத் தலைமைச் செயலாளர் இறையன்பு, கடிதத்தில் கூறியுள்ளதாவது: தமிழக இணைய கல்விக் கழகம்(டிவிஏ) மேம்படுத்தியுள்ள தமிழ் யூனிகோட் அனைத்து வகை தமிழ் குறிஅமைவு(TACE16) கொண்ட எழுத்துருக்கள்(fonts), விசைப்பலகை செலுத்துகைகள்(keyboard drivers) ஆகியவற்றுக்கு தமிழக தகவல்தொழில் நுட்பத்துறை ஆணை 5ன்படி, அனுமதி அளித்து வெளியிட்டுள்ளது. இவை இலவசமாக கிடைக்கும்.

மேலும், தகவல் தொழில் நுட்பத் துறையின் கடிதம் எண் 3973ன்படி, அனைத்து அரசு துறைச் செயலாளர்கள், மற்றும் துறையின் தலைவர்கள் ஆகியோர், வானவில், அவ்வையார் எழுத்துருக்களுக்கு பதிலாக மேற்கண்ட தமிழ் யூனிகோட் எழுத்துருவை பயன்படுத்தலாம் என்று தெரிவிக்கப்படுகிறது. இதையடுத்து அனைத்து அரசுத்துறைகளில் மேற்கொள்ளப்பட்ட ஆய்வின்படி இதுவரை வானவில், அவ்வையார் போன்ற எழுத்துருக்களைத் தான் தினசரி பணிகளில் பயன்படுத்தி வருவது தெரியவந்துள்ளது. இதற்கு காரணம் அந்த எழுத்துருக்களை யூனிகோட்டுக்கு மாற்றி அமைக்கின்ற கருவிகள் இல்லாமையால் மேற்கண்ட எழுத்துருக்களை பயன்படுத்தும் நிலையில் உள்ளதாகவும் தெரியவந்துள்ளது. எனவே, டிவிஏ மேம்படுத்தியுள்ள தமிழ் யூனிகோட் மாற்றி அமைக்கும்  கருவி(Tamil Unicode Conversion Tool), தமிழ் யூனிகோட் எழுத்துரு ஆகியவை http;//www.tamilvu.org  என்ற இணைய தளத்தில் இலவசமாக கிடைக்க ஏற்பாடு செய்யப்பட்டுள்ளது. இவ்வாறு  கடிதத்தில் தெரிவித்துள்ளார்.