அளவுக்கு அதிகமான வகையில் இந்தியா ஆயுதங்களை வாங்குகிறது..இது ஆயுத குவிப்பிற்கு வழி வகுக்கும்: பாகிஸ்தான் கருத்து

இஸ்லாமாபாத்: அளவுக்கு அதிகமான வகையில் இந்தியா ஆயுதங்களை வாங்குகிறது என பாகிஸ்தான் வெளியுறவுத்துறை கருத்து தெரிவித்துள்ளது.  பிரான்ஸ் நாட்டிடம் இருந்து இந்தியா ரபேல் போர் விமானங்களை ஆர்டர் செய்துள்ளது.மொத்தமாக 36 விமானங்களை இந்தியா ஆர்டர் செய்த நிலையில் நேற்று 5 விமானங்கள் இந்தியா கொண்டு வரப்பட்டது. பிரான்ஸ் நாட்டின் அதி நவீன 4.5ம் தலைமுறையைச் சேர்ந்த ரபேல் போர் விமானங்கள் ஆகும் இது. ஹரியானாவில் உள்ள அம்பாலா விமான தளத்திற்கு இந்த விமானங்கள் நேற்று வந்தது. இந்த விமானங்கள் இந்தியா வந்ததை மக்கள் திருவிழா போல கொண்டாடினார்கள். அதற்கு உற்சாக வரவேற்பு அளிக்கப்பட்டது.  இந்நிலையில் இது தொடர்பாக பாகிஸ்தான் வெளியுறவு அமைச்சகத்தின் செய்தித் தொடர்பாளர் ஆயிஷா ஃபாரூகி கூறுகையில், சில முன்னாள் மூத்த இந்திய அதிகாரிகள் மற்றும் பல சர்வதேச தகவலின்படி, இந்த ரஃபேல் ஜெட் விமானங்கள் இரட்டை திறன் கொண்ட அமைப்புகள் ஆகும்.

அவை அணு ஆயுத விநியோக தளங்களாக மாற்றப்படலாம். வகை மற்றும் விநியோக முறைகளின் அடிப்படையில் இந்தியா தனது அணு ஆயுதங்களை விரிவுபடுத்தி நவீனமயமாக்குகிறது என்பது அனைவரும் அறிந்ததே. இது தவிர, இந்தியா இந்தியப் பெருங்கடலை அணுசக்தி மயமாக்கியுள்ளதுடன், ஏவுகணை அமைப்புகளை தகரமாக்குவது போன்ற நடவடிக்கைகளின் மூலம் அதன் ஆயுதக் களஞ்சியத்தைத் தொடர்ந்து அதிகரித்து வருகிறது. இந்தியா தனது உண்மையான பாதுகாப்புத் தேவைக்கு அப்பால் இராணுவத் திறன்களைத் தொடர்ந்து சேகரித்து வருவது கவலைக்குரியது. இந்தியாவின் இந்த நவடிக்கை தெற்காசியாவில் பெரும் ஆயுத குவிப்பிற்கு வழி வகுக்கும். நம்பகமான மற்றும் புகழ்பெற்ற சர்வதேச ஆராய்ச்சி நிறுவனங்களின்படி, இந்தியா இப்போது உலகின் இரண்டாவது பெரிய ஆயுத இறக்குமதியாளராக உள்ளது, என தெரிவித்துள்ளார்.