கார்த்திகை தீபத்திருவிழாவை முன்னிட்டு மலைக்கோட்டை கோயில் கொப்பரையில் 900 லி. எண்ணெய் ஊற்றும் பணி துவக்கம்

திருச்சி: கார்த்திகை தீபத் திருநாளை முன்னிட்டு திருச்சி மலைக்கோட்டை கோயிலில் அமைக்கப்பட்ட மெகா கொப்பரையில் 900 லிட்டர் எண்ணெய் ஊற்றும் பணி நேற்று துவங்கியது. 300 மீட்டர் திரி தயாரிப்பு பணி நிறைவு பெற்றது. கார்த்திகை தீப திருநாளையொட்டி திருச்சி மலைக்கோட்டை தாயுமானசுவாமி கோயிலில் வரும் 10ம் தேதி மாலை 6 மணிக்கு மகா தீபம் ஏற்றப்படுகிறது. இதையொட்டி அன்று மாலை மலைக்கோட்டையின் நடுப்பகுதியில் உள்ள தாயுமானசுவாமி கோயிலில் இருந்து உச்சிப்பிள்ளையார் சன்னதிக்கு முன் உள்ள உயரமான கோபுரத்தில் அமைக்கப்பட்ட பிரமாண்ட செப்பு கொப்பரையில் பருத்தி துணியில் தயாரிக்கப்பட்ட திரி வைக்கப்பட்டு அதில் எண்ணெய் மற்றும் நெய் ஆகியவற்றை ஊற்றி மகா தீபம் ஏற்றப்படும். இந்த தீபம் தொடர்ந்து 3 நாட்கள் அணையாமல் எரியும். இந்த தீபத்திருநாளில் உள்ளூர் மட்டுமின்றி பிற மாவட்டங்களில் இருந்தும் பக்தர்கள் அதிகளவில் வந்து சாமி தரிசனம் செய்வார்கள்.

கார்த்திகை தீபத்தையொட்டி 300 மீட்டர் பருத்தி துணியில் திரி தயாரிக்கும் பணி கடந்த சில நாட்களாக நடந்து வந்தது. இந்த பணி முடிவடைந்து, பிரமாண்ட முறையில் தயாரிக்கப்பட்ட திரியை கோயில் ஊழியர்கள் கயிறு கட்டி கோபுரத்தின் உச்சியில் உள்ள செப்பு கொப்பரையில் வைக்க நேற்றுமுன்தினம் மாலை தூக்கி சென்றனர். பின்னர் கோபுரத்தின் உச்சிக்கு கயிறு கட்டி எடுத்து சென்று செப்பு கொப்பரையில் திாியை வைத்தனர். பின்னர் அங்கு தயார் நிலையில் வைக்கப்பட்டிருந்த 900 லிட்டர் அளவு கொண்ட இலுப்பை எண்ணை, நல்லெண்ணை மற்றும் நெய் ஆகியவற்றை கொப்பரையில் ஊற்றும் பணி தொடங்கியது. இந்த பணி ஒருநாள் விட்டு ஒருநாள் நடைபெறும். இதனால் திரி நன்றாக எண்ணெயில் ஊறி, 3 நாட்கள் தொடர்ந்து எரியும்.