ஸ்ரீகாளஹஸ்தி: ஸ்ரீகாளஹஸ்தி சிவன் கோயிலின் தலைமை அர்ச்சகர் திடீரென மரணம் அடைந்ததால், நடை அடைக்கப்பட்டது. ஆந்திர மாநிலம், சித்தூர் மாவட்டத்தில் அமைந்துள்ள காளஹஸ்தி சிவன் கோயிலின் தலைமை அர்ச்சகர் சதாசிவ குருக்கள் கடந்த சில நாட்களாக உடல்நிலை பாதிக்கப்பட்டு சென்னையில் ஒரு தனியார் மருத்துவமனையில் சிகிச்சை பெற்று வந்தார்.
நேற்று காலை சிகிச்சை பலனின்றி அவர் இறந்தார். இதனால், காளஹஸ்தி சிவன் கோயிலில் காலை 10.30 மணி முதல் இரவு 7 மணி வரை நடை அடைக்கப்பட்டது. மேலும், ராகு, கேது சர்ப்ப தோஷ நிவாரண பூஜைகளும் நடத்தப்படாது என்று அறிவிக்கப்பட்டது. தொடர்ந்து இரவு 7 மணிக்கு மேல் நடை திறக்கப்பட்டு பரிகார பூஜைகள் செய்து, மூலவருக்கு அபிஷேக, ஆராதனைகள் நடத்தப்பட்டது. பின்னர், 9 மணி நேரத்துக்கு பின் வழக்கம்போல் பக்தர்கள் தரிசனம் செய்ய அனுமதிக்கப்பட்டனர்.
