சென்னை: மீஞ்சூர் அடுத்த, காட்டுப்பள்ளி அதானி துறைமுகத்தில் இறக்குமதி செய்யப்பட்ட கன்டெய்னரில் இருந்து, 9 கோடி ரூபாய் மதிப்பிலான வெள்ளிக் கட்டிகள் மாயமான வழக்கில், 9 பேரை கைது செய்த போலீசார் அவர்களை சிறையில் அடைத்துள்ளனர். அவர்களிடம் இருந்து ரூ.5 கோடி மதிப்பிலான வெள்ளிக்கட்டிகள் மீட்கப்பட்டுள்ளன. சென்னை ஸ்ரீபெரும்புதூரைச் சேர்ந்த தனியார் ஏற்றுமதி இறக்குமதி நிறுவனம் ஒன்று லண்டனில் இருந்து 2 கன்டெய்னர்கள் மூலம் சுமார் 39 டன் வெள்ளிக்கட்டிகளை கடந்த 3ம் தேதி இறக்குமதி செய்தது.
2 கன்டெய்னர்கள் மூலம் வந்த வெள்ளிக் கட்டிகளை துறைமுகத்தில் இருந்து லாரிகள் மூலம் தங்களது வேர் ஹவுஸ் நிறுவனத்திற்கு கொண்டு சென்று தனியார் நிறுவனம் ஆய்வு செய்தது. அப்போது 20 டன் எடை கொண்ட வெள்ளி கட்டிகள் வந்த கன்டெய்னர் பெட்டி சரியாக இருந்த நிலையில், 19 டன் எடை கொண்ட வெள்ளி கட்டிகள் வந்த கன்டெய்னர் பெட்டியில் எடை குறைவாக இருந்தது தெரியவந்தது.
இதனையடுத்து தொடர்ந்து ஆய்வு மேற்கொண்டபோது சுமார் 9 கோடி ரூபாய் மதிப்பிலான 922 கிலோ எடை கொண்ட 30 வெள்ளிக்கட்டிகள் மாயமானது தெரியவந்தது. இதனைத் தொடர்ந்து, கன்டெய்னரில் பொருத்தப்பட்டிருந்த ஜிபிஎஸ் கருவியை தனியார் நிறுவன அதிகாரிகள் ஆய்வு செய்தனர். அப்போது, அதானி துறைமுகத்தில் இருந்து சரக்குகளை வெளியே அனுப்புவதற்கு முன்பாக கன்டெய்னர் பெட்டி திறக்கப்பட்டிருப்பது உறுதியானது.
இதனையடுத்து, தனியார் நிறுவனத்தின் மேலாளர் தாசரி ஸ்ரீஹரி ராவ் இது தொடர்பாக காட்டூர் காவல் நிலையத்தில் கடந்த 5ம் தேதி புகார் அளித்துள்ளார். இப்புகாரின் பேரில், காட்டூர் போலீசார் திருட்டு வழக்குபதிவு செய்து விசாரணையில் ஈடுபட்டனர். இந்தநிலையில், இந்த துணிகர திருட்டில் தொடர்புடைய நவீன்குமார், ஆகாஷ், அவினாஷ், தேசிங்கு, குணசீலன், சந்தோஷ், வெங்கடேஷ், முகமது, சண்முகவேல் ஆகிய 9 பேரை நேற்று முன்தினம் போலீசார் கைது செய்து சிறையில் அடைத்தனர்.
பின்னர் அவர்கள் திருடியதில் இருந்து சுமார் ரூ.5 கோடி மதிப்பிலான 510 கிலோ எடை கொண்ட 17 வெள்ளிக் கட்டிகள், 40 லட்ச ரூபாய் ரொக்கம் ஆகியவை பறிமுதல் செய்யப்பட்டன. எஞ்சிய வெள்ளிக் கட்டிகளை பறிமுதல் செய்வது குறித்து மேலும் சிலரைப் பிடித்து காட்டூர் போலீசார் விசாரணை நடத்தி வருகின்றனர்.
The post காட்டுப்பள்ளி துறைமுகத்தில் திருடப்பட்ட ரூ.5 கோடி வெள்ளி மீட்பு: மீதமுள்ள 510 கிலோ வெள்ளி குறித்து விசாரணை appeared first on Dinakaran.
