அண்ணாநகர்: அண்ணா நகரில் தனியார் அடுக்குமாடி குடியிருப்பு மொட்டை மாடியில் மது அருந்தி விட்டு குடியிருப்புவாசிகளிடம் தகராறு செய்தவரை தட்டிக்கேட்ட சிறப்பு உதவி ஆய்வாளருக்கு சரமாரியாக உருட்டுக்கட்டை அடி விழுந்தது. அவரை தாக்கிய போதை ஆசாமி தலைமறைவாகி விட்டார். சென்னை அண்ணா நகர் அடுக்குமாடி குடியிருப்பில் குடும்பத்துடன் வசித்து வருபவர் பிரபு (38), இவரது தம்பி பாலாஜி (30). இவர் பெங்களூருவில் வசித்து வருகிறார். கடந்த 21ம் தேதி அன்று அண்ணண் பிரபு வீட்டிற்கு வந்து பாலாஜி தங்கியுள்ளார்.
நேற்று முன்தினம் இரவு பாலாஜி மொட்டைமாடிக்கு சென்று மது அருந்தியுள்ளார். அப்போது போதை தலைக்கேறியதும் அப்பகுதி குடியிருப்பில் வசித்து வரும் பொதுமக்களிடம் தகராறு செய்துள்ளார். உடனே, குடியிருப்புவாசிகள் அவரது அண்ணண் பிரபுவிடம், உங்க தம்பி மதுபோதையில் தகராறு செய்கிறார் என தெரிவித்துள்ளனர். அப்போது பிரபு, தம்பி பாலாஜியிடம் சென்று எதற்காக மதுபோதையில் தகராறு செய்து கொண்டிருக்கிறாய், ஒழுங்காக வீட்டில் வந்து தூங்கு என்று கூறியுள்ளார். இதனால் கடும் ஆத்திரம் அடைந்த பாலாஜி குடியிருப்புவாசிகளிடம் தகராறில் ஈடுபட்டுள்ளார்.
எனவே, ஆத்திரம் அடைந்த பிரபு காவல் கட்டுப்பாட்டு அறைக்கு போன் செய்தார். சம்பவ இடத்திற்கு விரைந்து வந்த அண்ணா நகர் காவல் நிலைய சிறப்பு உதவி ஆய்வாளர் ரமேஷ் போதையில் தகராறு செய்த பாலாஜியை தட்டிக்கேட்டபோது, அருகில் கிடந்த கட்டையை எடுத்து உதவி ஆய்வாளரை சரமாரியாக தாக்கி விட்டு அங்கிருந்து தப்பி ஓடிவிட்டார். இதில் உதவி ஆய்வாளரின் கண் புருவம் மற்றும் தலையின் பின்புறம் காயம் ஏற்பட்டது. இதை பார்த்து குடியிருப்புவாசிகள் கடும் அதிர்ச்சி அடைந்தனர்.
தகவல் அறிந்து இன்ஸ்பெக்டர் சரவணன் சம்பவ இடத்திற்கு விரைந்து வந்து காயம் அடைந்த உதவி ஆய்வாளரை மீட்டு கீழ்ப்பாக்கம் அரசு மருத்துவமனைக்கு அனுப்பி வைத்தார். அங்கு சிகிச்சை அளிக்கப்பட்டு உதவி ஆய்வாளர் வீடு திரும்பினார். இதுகுறித்து அண்ணாநகர் போலீசார் வழக்கு பதிவு செய்து உதவி ஆய்வாளரை சரமாரியாக தாக்கி விட்டு தப்பி சென்ற போதை ஆசாமி பாலாஜியை வலைவீசி தேடி வருகின்றனர். மேலும் மதுபோதையில் குடியிருப்புவாசிகளிடம் தகராறு செய்த போதை ஆசாமியை தட்டிக் கேட்ட சிறப்பு உதவி ஆய்வாளரை கட்டையால் தாக்கிய சம்பவம் அப்பகுதியில் பெரும் பரபரப்பை ஏற்படுத்தி உள்ளது.
The post குடியிருப்புவாசிகளிடம் தகராறு செய்ததை கண்டித்த சிறப்பு எஸ்.ஐ.யை கட்டையால் சரமாரி தாக்கிய போதை வாலிபர் appeared first on Dinakaran.
