*நடவடிக்கை எடுக்க கோரிக்கை
ஜோலார்பேட்டை : ஜோலார்பேட்டை அருகே போக்குவரத்துக்கு இடையூறாக சாலைகளில் சுற்றித்திரியும் கால்நடைகளால் வாகன ஓட்டிகள் அச்சத்துடன் பயணித்து வருகின்றனர்.
ஜோலார்பேட்டை அடுத்த பாச்சல் ஊராட்சிக்குட்பட்ட சாலைகளில் பல்வேறு பணியின் காரணமாக அரசு, தனியார் நிறுவனங்களில் வேலை செய்பவர்களும், பள்ளி மற்றும் கல்லூரி மாணவர்களும், பொதுமக்களும் என பல்வேறு தரப்பினரும் பயணித்து வருகின்றனர். இதனால் காலை மற்றும் மாலை நேரங்களில் இங்குள்ள சாலைகளில் பொதுமக்களின் நடமாட்டம் அதிகரித்து வருகிறது.
இந்நிலையில், பாச்சல் ஊராட்சிக்குட்பட்ட பகுதிகளில் வசிக்கும் சிலர் கால்நடைகளை வளர்த்து வருகின்றனர். இந்த கால்நடைகளை மேய்ச்சலுக்காக அவிழ்த்துவிடப்படுவதால் சாலையோரங்களில் கொட்டப்படும் காய்கறி கழிவுகள், கீரைகள், பழங்கள், வாழை இலைகள் போன்றவற்றை சாப்பிடுவதற்காக சாலைகளில் ஆங்காங்கே சுற்றித்திரிகின்றன.
இதனால் வாகன ஓட்டிகள் பயணிக்கும்போது, சாலையின் குறுக்கே கால்நடைகள் திடீரென கடந்து செல்வதால் அடிக்கடி விபத்து ஏற்படும் அசம்பாவிதம் அரங்கேறி வருகிறது. எனவே, சம்பந்தப்பட்ட அதிகாரிகள் சாலைகளில் சுற்றித்திரியும் கால்நடைகளை கட்டுப்படுத்த உரிய நடவடிக்கை மேற்கொள்ள வேண்டும் என பொதுமக்களும், வாகன ஓட்டிகளும் கோரிக்கை விடுத்துள்ளனர்.
The post ஜோலார்பேட்டை அருகே சாலைகளில் போக்குவரத்திற்கு இடையூறாக சுற்றித்திரியும் கால்நடைகள் appeared first on Dinakaran.
