சென்னை: தமிழகத்தில் வரும் ஜனவரி 14ம் தேதி பொங்கல் பண்டிகை வருகிறது. முன்னதாக 13ம் தேதி போகி பண்டிகையும், 15ம் தேதி மாட்டுப்பொங்கல், 16ம் தேதி காணும்பொங்கல் கொண்டாடப்படுகிறது. இதனால் 4 நாட்கள் விடுமுறையாக இருக்கிறது. எனவே சென்னை உள்ளிட்ட நகரங்களில் படிப்பு, பணி, தொழில் நிமித்தமாக தங்கி இருப்போர், சொந்த ஊர்களுக்கு சென்று குடும்பத்தினரோடு பண்டிகையை கொண்டாடுவார்கள். இவர்களின் வசதிக்காக அரசு போக்குவரத்துக்கழகத்தின் சார்பில் சிறப்பு பேருந்துகள் இயக்கப்படவுள்ளது. இதற்கான முன்பதிவு கடந்த வாரம் தொடங்கியுள்ளது. இதையடுத்து அரசு போக்குவரத்துக்கழக முன்பதிவு மையங்கள், இணையதளம் முகவரியான www.tnstc.in என்ற இணையதளத்திலும், தனியார் ஆப்களை பயன்படுத்தி பலரும் முன்பதிவு செய்து வருகின்றனர். நடப்பு 2021ம் ஆண்டு பொங்கல் பண்டிகையின் போது சென்னையிலிருந்து 10,228 பேருந்துகளும், பிற ஊர்களிலிருந்து 5,993 சிறப்பு பேருந்துகள் என மொத்தமாக 16,221 பேருந்துகள் இயக்கப்பட்டது. இதேபோல் பொங்கல் பண்டிகை முடிந்த பின்னர், 15,270 பஸ்கள் இயக்கப்பட்டன. மேலும் கூட்ட நெரிசலை குறைக்கும் வகையில் 5 இடங்களில் இருந்து பஸ்கள் இயக்கப்பட்டது. ஆனால் வரும் பொங்கல் பண்டிகைக்கு எத்தனை பேருந்துகள் இயக்கப்படும் என்பது குறித்து இதுவரை அதிகாரப்பூர்வமாக அறிவிக்கப்படாத நிலையில், இன்று முக்கிய தகவல் வெளியாக வாய்ப்புள்ளதாக கூறப்படுகிறது. இதுகுறித்து போக்குவரத்துத்துறை அதிகாரிகள் கூறுகையில், ‘அரசு போக்குவரத்துத்துறையின் சார்பில் பொங்கல் பண்டிகைக்கு எடுக்க வேண்டிய நடவடிக்கைகள் குறித்து தொடர்ந்து விவாதித்து வருகிறோம். அதன் தொடர்ச்சியாக இன்று மாலை 4 மணிக்கு தலைமைச் செயலகத்தில், 9வது மாடியில் உள்ள தொழில்துறை கருத்தரங்க கூட்டத்தில் பல்வேறு துறைகளை சார்ந்த அலுவலர்களுடன் 2022ம் ஆண்டு பொங்கல் திருநாளை முன்னிட்டு போக்குவரத்துத்துறையின் சார்பில் செயல்படுத்தப்பட உள்ள சிறப்பு ஏற்பாடுகள் குறித்த ஆலோசனை கூட்டம் நடக்கிறது. இதில் போக்குவரத்துத்துறை அமைச்சர் ராஜகண்ணப்பன் கலந்து கொள்கிறார். மேலும் அதிகாரிகள் பலர் பங்கேற்கின்றனர். இதனைத் தொடர்ந்து பொங்கல் பண்டிகைக்கு இயக்கப்படும் சிறப்பு பஸ்களின் எண்ணிக்கை, தற்காலிக பேருந்து நிலையங்கள் போன்ற பல்வேறு தகவல்கள் அதிகாரப்பூர்வமாக வெளியாக வாய்ப்புள்ளது. ஆனால் இதனை உறுதியாக கூறமுடியாது. ஒருவேளை இன்று வெளியாகவில்லை என்றால், விரைவில் அறிவிக்கப்படும்’ என்றனர்….
The post பொங்கல் சிறப்பு பஸ்கள் குறித்து இன்று அறிவிப்பு: போக்குவரத்து துறை அதிகாரிகள் தகவல் appeared first on Dinakaran.
