சென்னை: தமிழக அரசின் சிறப்பு பகுதி மேம்பாட்டு திட்டத்தின் வாயிலாக ரூ3 கோடி மதிப்பீட்டிலான 20 இண்ட்கோ தேநீர் ஊர்திகளை முதல்வர் மு.க.ஸ்டாலின் நேற்று தொடங்கி வைத்தார். சென்னை தலைமை செயலகத்தில், முதல்வர் மு.க.ஸ்டாலின் நேற்று, தமிழ்நாடு அரசின் சிறப்பு பகுதி மேம்பாட்டு திட்டத்தின் வாயிலாக ரூ3 கோடி மதிப்பீட்டிலான 20 இண்ட்கோ தேநீர் ஊர்திகளை கொடியசைத்து தொடங்கி வைத்தார். இந்த தேநீர் ஊர்தி, இந்தியாவின் மாபெரும் கூட்டுறவு இணையமான இண்ட்கோசர்வ் நிறுவனத்தால் வடிவமைக்கப்பட்டுள்ளது. இந்த தேநீர் மற்றும் சிற்றுண்டி ஊர்திகளின் மூலம் வியாபாரம் மேற்கொள்ளும் முறை அகில இந்திய அளவில் மிகவும் பிரபலமடைந்து வருகிறது. 1965ம் ஆண்டில் நிறுவப்பட்ட இண்ட்கோசர்வ் நிறுவனம், நீலகிரி மாவட்டத்தில் உள்ள 30,000 சிறு தேயிலை விவசாயிகளின் வாழ்க்கைத்தரம் மேம்படும் வகையில் செயல்பட்டு வருகிறது. இந்நிறுவனத்தின் மூலம் 16 கூட்டுறவு தேயிலை தொழிற்சாலைகளில் ஆண்டொன்றுக்கு 14 மில்லியன் கிலோ தேயிலைத்தூள் உற்பத்தி செய்யப்பட்டு விற்பனை செய்யப்பட்டு வருகிறது.முதல்வரால் தொடங்கி வைக்கப்பட்ட தேநீர் ஊர்திகளில், மலைவாழ் மக்களுக்கு வேலைவாய்ப்பு அளிக்கப்பட்டு, அவர்களது வாழ்க்கை தரம் உயர வழிவகை செய்யப்பட்டுள்ளது. மேலும், இந்த ஊர்திகள் சென்னை, கோயம்புத்தூர், திருப்பூர் மற்றும் நீலகிரி மாவட்டங்களில் இயக்கப்பட உள்ளது. இதன்மூலம் இண்ட்கோசர்வின் தேயிலை தயாரிப்புகளை சில்லரை வர்த்தகத்தில் கொண்டு செல்ல மிகவும் உறுதுணையாக அமையும். இண்ட்கோசர்வ் தயாரிப்புகள் அனைத்தும் 100 சதவீதம் இயற்கை பொருட்களை மட்டுமே கொண்டு தயாரிக்கப்பட்டவையாகும். இந்த ஊர்திகளில் பல வகையான தேநீர், கூடுதலாக காபி மற்றும் சிற்றுண்டிகளும் விற்பனை செய்யப்படும். இந்த நிகழ்வின்போது குறு, சிறு மற்றும் நடுத்தர தொழில் நிறுவனங்கள் துறை அமைச்சர் தா.மோ.அன்பரசன், தலைமை செயலாளர் இறையன்பு, குறு, சிறு மற்றும் நடுத்தர தொழில் நிறுவனங்கள் துறை செயலாளர் அருண் ராய், இண்ட்கோசர்வ் முதன்மை செயல் அலுவலர் சுப்ரியா சாஹூ, தொழில் ஆணையர் மற்றும் தொழில் வணிக இயக்குநர் சிஜி தாமஸ் வைத்யன் மற்றும் அரசு உயர் அதிகாரிகள் உடனிருந்தனர்….
The post சிறப்பு பகுதி மேம்பாட்டு திட்டத்தின் வாயிலாக ரூ3 கோடி மதிப்பீட்டிலான 20 இண்ட்கோ தேநீர் ஊர்திகள்: முதல்வர் மு.க.ஸ்டாலின் தொடங்கி வைத்தார் appeared first on Dinakaran.
