உடுப்பி: கர்நாடகவின் அரபிக் கடல் பகுதிகளில் தென்மேற்கு பருவமழை காலத்தில் இயந்திர படகுகளில் மீன்பிடிக்க தடை விதிக்கப்பட்டுள்ளது. பாரம்பரிய படகில் மீன்பிடிக்க மட்டுமே அனுமதி. இருப்பினும், கடலோர மாவட்டங்களில் உள்ள மீன் ஆர்வலர்களின் தேவையை பூர்த்தி செய்ய பாரம்பரிய படகுகளில் இருந்து பிடிபடுவது போதுமானதாக இல்லை. இதனால், அண்டை மாநிலங்களான ஒடிசா, ஆந்திரா, தமிழ்நாடு உள்ளிட்ட மாநிலங்களில் இருந்து மீன்கள் கொள்முதல் செய்யப்பட்டு, தினமும் 15 டிரக்குகளில் டன் கணக்கில் மீன்கள் மல்பே துறைமுகத்திற்கு வந்து சேருகின்றன.
கேரளா முதல் குஜராத் வரையிலான இந்தியாவின் மேற்கு கடற்கரைப் பகுதிகள் முழுவதும் பருவமழைக் காலத்தில் மீன்பிடிக்க தடை விதிக்கப்பட்டுள்ள நிலையில், கிழக்கு கடற்கரை பகுதிகளுக்கு இந்த தடை பொருந்தாது. மேற்கு கடற்கரையில் மீன்பிடி சீசன் துவங்கியதும், தடை உத்தரவு கிழக்கு கடற்கரைக்கு மாறுகிறது. ஒடிசாவில் இருந்து சில்வர் மீன் மற்றும் சிறிய கானாங்கெளுத்தி, ஆந்திராவில் இருந்து மத்தி மற்றும் சிறிய கானாங்கெளுத்தி, தமிழகத்தில் இருந்து மத்தி போன்ற மீன் வகைகள் மல்பே துறைமுகத்திற்கு கொண்டு வரப்படுகின்றன.
இது குறித்து மீன் வியாபாரிகள் கூறுகையில் அதிக வேகத்தில் வீசும் காற்று காரணமாக பாரம்பரிய படகுகள் கூட கணிசமான அளவு மீன்களைப் பிடிக்க சிரமப்படுகின்றன. இறால் மட்டுமே சிறிய அளவில் கிடைக்கும். பருவமழை பொய்த்தாலும் லட்சக்கணக்கான ரூபாய் மதிப்பிலான மீன் வியாபாரம் நடந்து வருகிறது.வரத்து குறைந்ததால், மீன் விலை கடுமையாக உயர்ந்துள்ளது. தற்போது 25 கிலோ எடையுள்ள சிறிய கானாங்கெளுத்தி ரூ.4,000 க்கும், மத்தியின் விலை 25 கிலோ பெட்டிக்கு ரூ.5,500 முதல் ரூ.6,000 வரையிலும் விற்கப்படுகிறது.
புதிய வெள்ளி மீன் கிலோ ரூ.150 முதல் ரூ.160 வரை விற்பனை செய்யப்படுகிறது என்றார். மல்பேயை சேர்ந்த மீன் வியாபாரி தினேஷ் சுவர்ணா கூறுகையில், “ஒவ்வொரு ஆண்டும் பருவமழைக் காலத்தில், கடலோர கர்நாடகாவில், முதன்மையாக ஒடிசா, ஆந்திரா மற்றும் தமிழ்நாடு ஆகிய மாநிலங்களில் இருந்து வெளி மாநிலங்களில் இருந்து மீன்கள் கொள்முதல் செய்யப்படுகின்றன. இதனால் வழக்கத்தை விட விலை அதிகமாக உள்ளது ” என்றார்.
The post மீன்பிடி தடைக்காலம் எதிரொலி வெளி மாநிலங்களில் இருந்து மீன் கொள்முதல் அதிகரிப்பு appeared first on Dinakaran.
