சிட்னி :பாகிஸ்தான் அணிக்கு எதிரான கடைசி டெஸ்ட் போட்டி நாளை மறுநாள் சிட்னியில் நடக்கவுள்ளது. சொந்த மண்ணில் விளையாடும் இந்த டெஸ்ட் போட்டியுடன் ஆஸ்திரேலியா அணியின் டேவிட் வார்னர், டெஸ்ட் கிரிக்கெட்டில் இருந்து ஏற்கனவே ஓய்வை அறிவித்தார். இந்த நிலையில் ஒருநாள் கிரிக்கெட்டில் இருந்து ஓய்வுபெறுவதாக டேவிட் வார்னர் மற்றொரு அதிர்ச்சியை ரசிகர்களுக்கு கொடுத்துள்ளார். இந்தியாவில் நடைபெற்ற உலகக்கோப்பை தொடரை ஆஸ்திரேலிய அணி வென்ற நிலையில், அந்த அணியின் வெற்றிக்கு முக்கிய காரணமாக அமைந்தார். இதனால் டெஸ்ட் கிரிக்கெட்டில் இருந்து ஓய்வுபெற்றாலும், ஒருநாள் மற்றும் டி20 கிரிக்கெட்டில் விளையாடுவார் என்று எதிர்பார்க்கப்பட்டது.
இந்த நிலையில் சிட்னி மைதானத்தில் டேவிட் வார்னர் நிருபர்களிடம் கூறுகையில் “ஒருநாள் கிரிக்கெட்டில் இருந்தும் ஓய்வு பெறுவதாக தெரிவித்து கொள்ள விரும்புகிறேன். உலகக்கோப்பை தொடரின் போதே தொடர்ந்து இதுகுறித்து பேசி வருகிறேன். அதன்படி இந்தியாவில் கோப்பையை வென்றதே மிகப்பெரிய சாதனை தான். அதன்பின் இன்றே ஓய்வு அறிவிப்பை வெளியிடலாம் என்று முடிவெடுத்து கூறி கொள்கிறேன். ஒருநாள் போட்டிகளில் ஓய்வை அறிவிப்பதன் மூலமாக உலகம் முழுவதும் நடக்கும் டி20 மற்றும் டி10 லீக் போட்டிகளில் விளையாட முடியும். இதன் மூலமாக ஒருநாள் போட்டிகளில் ஆஸ்திரேலிய அணி எதிர்காலத்திற்கு தேவையான வீரர்களுக்கும் வாய்ப்பு வழங்க முடியும். இன்னும் இரு ஆண்டுகளில் சாம்பியன்ஸ் டிராபி தொடர் வருவதை அறிவேன்.
ஒருவேளை அடுத்த 2 ஆண்டுகளில் நான் நல்ல கிரிக்கெட்டை ஆடினால், ஆஸ்திரேலிய அணிக்கு தேவையென்றால், நிச்சயம் சாம்பியன்ஸ் டிராபி தொடரில் விளையாட தயாராக இருக்கிறேன்’’ என்றார்.இதுவரை 161 ஒருநாள் போட்டிகளில் விளையாடியுள்ள டேவிட் வார்னர் 22 சதங்கள், 33 அரைசதங்கள் உட்பட 6,932 ரன்களை விளாசியுள்ளார். இதன் மூலம் ஆஸ்திரேலிய அணிக்காக அதிக ரன்களை விளாசிய வீரர்கள் பட்டியலில் டேவிட் வார்னர் 6வது இடத்தில் உள்ளார். 2027 உலகக்கோப்பை வரை ஒருநாள் கிரிக்கெட்டில் விளையாடுவார் என்று எதிர்பார்க்கப்பட்ட நிலையில், திடீரென வார்னர் ஓய்வை அறிவித்துள்ளது ரசிகர்களிடையே அதிர்ச்சியை ஏற்படுத்தியுள்ளது.
The post ஒரு நாள் கிரிக்கெட்டிலிருந்தும் ஓய்வு; டேவிட் வார்னர் அறிவிப்பு.! ரசிகர்கள் அதிர்ச்சி appeared first on Dinakaran.
