புதுடெல்லி: டெல்லி புதிய மதுபானக்கொள்கையில் யாரிடமும் பணம் வாங்காத சிசோடியா மீது அமலாக்கத்துறை வழக்குப்பதிவு செய்யப்பட்டது எப்படி என்று உச்ச நீதிமன்றம் சரமாரி கேள்வி எழுப்பியது.டெல்லி ஆம் ஆத்மி அரசு கொண்டு வந்த மதுபான கொள்கையில் மிக பெரிய ஊழல் நடந்துள்ளதாக குற்றச்சாட்டு எழுந்தது. இந்த வழக்கில் டெல்லி முன்னாள் துணை முதல்வர் மனிஷ் சிசோடியாவை அமலாக்கத்துறை கைது செய்து சிறையில் அடைத்தது. மனிஷ் சிசோடியாவுக்கு ஜாமீன் கோரி உச்சநீதிமன்றத்தில் மேல்முறையீட்டு மனு தாக்கல் செய்யப்பட்டுள்ளது. உச்ச நீதிமன்ற நீதிபதிகள் சஞ்சீவ் கன்னா, எஸ்விஎன் பட்டி அமர்வு முன்பு மனு விசாரணைக்கு வந்தது.
அப்போது நீதிபதிகள் கூறும்போது,’ புதிய கலால் கொள்கையை அமல்படுத்தியது ஒரு கொள்கை மாற்றம் என்பதை நாங்கள் புரிந்துகொள்கிறோம். இதில் வணிகத்திற்கு ஏற்ற கொள்கைகளை அனைவரும் ஆதரிப்பார்கள். ஆனால் பணத்தைக் கருத்தில் கொள்ளாமல் கொள்கை மாற்றங்கள் ஒரு பொருட்டல்ல. பணப் பகுதிதான் அதைக் குற்றமாக்குகிறது. நாங்கள் அதற்குள் சென்றால் எதுவும் இருக்க முடியாது, எந்த அரசும் செயல்பட முடியாது. குற்றச் செயல்களில் ஈடுபட்டதாகக் கூறப்படும் வருமானத்துடன் சிசோடியாவை இணைக்க எந்த ஆதாரமும் இல்லாத நிலையில், பணமோசடி குற்றத்திற்காக சிசோடியா மீது எப்படி வழக்குப் பதிவு செய்ய முடியும். சிசோடியா மீதான பணமோசடி குற்றச்சாட்டை நீங்கள் கண்டுபிடித்து உள்ளீர்களா? அவர் (சிசோடியா) கொள்கை மாற்றத்தின் மூலம் பெறப்பட்ட வருமானத்தை வேறு யாரிடமாவது பெறவில்லை.
இது அவர் வாங்கியது அல்ல. ஆனால் வேறு ஒருவரால் பயன்படுத்தப்படுகிறது. இதில் எப்படி சிசோடியா மீது வழக்குப்பதிவு செய்ய முடியும்?’ என்று நீதிபதிகள் கேள்வி எழுப்பினர். அதற்கு அமலாக்கத்துறை சார்பில் ஆஜரான கூடுதல் சொலிசிட்டர் ஜெனரல் ராஜு ‘ கலால் கொள்கையில் மாற்றத்தைத் திட்டமிடுவதன் மூலம் குற்றத்தின் வருமானத்தை உருவாக்குவதில் சிசோடியா முக்கிய பங்கு வகித்தார்’ என்றார். அதற்கு நீதிபதிகள்,’ இது சட்டவிரோதப்பணப்பரிமாற்ற சட்டம். இதுபற்றி நீங்கள் ஒரு சங்கிலியை நிறுவ வேண்டும். மதுபான லாபியில் இருந்து சம்பந்தப்பட்ட நபருக்கு பணம் பாய வேண்டும்.
ஆனால் இங்கு மனுதாரருக்கு (சிசோடியா) பணம் செல்லவில்லை. பணமோசடி என்பது முற்றிலும் வேறுபட்ட குற்றமாகும். அந்தச் சொத்தை அவர் உடைமையாக்கியுள்ளார் என்பதை நீங்கள் காட்ட வேண்டும். சட்டவிரோத பணப்பரிமாற்ற விதியின் சரியான வார்த்தைகளைப் பின்பற்றி அவரை எப்படி உள்ளே கொண்டு வருவீர்கள் என்பதைக் காட்ட வேண்டும்’ என்று தெரிவித்தனர். அதற்கு ராஜூ கூறுகையில்,’சிசோடியா பணம் ஈட்டுவதில் முக்கிய பங்காற்றினார். மொத்த விற்பனையாளர்களின் லாபப் பங்கு ஐந்து சதவீதத்தில் இருந்து 12 சதவீதமாக உயரும் வகையில் கொள்கையை மாற்றினார்’ என்றார். அதற்குநீதிபதிகள்,’நீங்கள் லஞ்சம் கொடுக்கும்போது, குற்றத்தின் வருமானத்துடன் தொடர்புடைய செயல்பாட்டில் நீங்கள் ஈடுபடுகிறீர்கள்.
இறுதியில் பணம் எதுவும் அனுப்பப்படவில்லை என்று வைத்துக்கொள்வோம். சட்டவிரோத பணப்பரிமாற்ற சட்டத்தை அமல்படுத்த முடியுமா?. இந்த சட்டத்தில் முக்கியமானது குற்றத்தின் வருமானம். குற்றத்தின் வருமானத்துடன் சம்பந்தப்பட்ட நபரை நேரடியாகவோ அல்லது மறைமுகமாகவோ இணைக்க வேண்டும். ஆனால் சிசோடியா குற்றத்தின் வருமானத்துடன் தொடர்புடையவர் என்பதைக் காட்ட எந்த ஆதாரமும் இல்லை’ என்றனர். அதற்கு ராஜூ,’ சிசோடியா நேரடியாகவும் மறைமுகமாகவும் குற்றச் செயல்களில் ஈடுபட்டுள்ளார். அவர் அரசியல் கட்சியின் பயன்பாட்டிற்காக பணம் சம்பாதித்தார்’ என்றார். இதையடுத்து நீதிபதிகள் இந்த வழக்கை அக்டோபர் 12ம் தேதிக்கு ஒத்திவைத்தனர்.
* ஆம்ஆத்மி பெயர் சேர்ப்பா?
இந்த வழக்கு நேற்றுமுன்தினம் விசாரணைக்கு வந்த போது நீதிபதிகள் சஞ்சீவ் கன்னா மற்றும் எஸ்.வி.என்.பட்டி ஆகியோர், இந்த வழக்கில் ஆம் ஆத்மி கட்சி பெயரை ஏன் சேர்க்கவில்லை என்பது பற்றி விளக்கம் அளிக்கும்படி அமலாக்கத்துறையிடம் கேட்டனர். நேற்று மீண்டும் விசாரணைக்கு வந்த போது சிசோடியா சார்பில் ஆஜரான மூத்த வழக்கறிஞர் அபிஷேக் சிங்வி,‘‘ நேற்று பத்திரிகைகள் மற்றும் தொலைக்காட்சிகள் இந்த வழக்கில் ஆம் ஆத்மி குற்றவாளியாக சேர்க்கப்படும் என செய்தி வெளியிட்டுள்ளன’’ என்றார்.
அப்போது குறுக்கிட்ட நீதிபதி சஞ்சீவ் கன்னா,‘‘சட்ட நுணுக்கத்தின் அடிப்படையில் இது கேட்கப்பட்டது, யாரையும் குறிவைத்து கேட்கப்படவில்லை. தெளிவான விளக்கத்தை பெறுவதற்காகதான் அவ்வாறு கேட்கப்பட்டது. நீதிமன்றம் முன் வைக்கப்பட்ட வாதத்தின் அடிப்படையில் கேட்கப்பட்டது. பத்திரிகைகள் அல்லது தொலைக்காட்சிகளில் அது பற்றி செய்தி வருவதால் எங்களை எந்த விதத்திலும் பாதிக்காது. இந்த விஷயத்தில் நீதிமன்றம் எந்த ஒரு முடிவுக்கும் வரவில்லை’’ என்றார்.
The post யாரிடமும் பணம் வாங்காத சிசோடியா மீது அமலாக்கத்துறை வழக்குப்பதிவு செய்தது எப்படி?..உச்சநீதிமன்றம் சரமாரி கேள்வி appeared first on Dinakaran.
