ஸ்ரீவில்லிபுத்தூரில் நாளை ஆடிப்பூர தேரோட்டம் ஸ்ரீரங்கத்தில் இருந்து ஆண்டாளுக்கு வஸ்திரங்கள் இன்று அனுப்பி வைப்பு

திருச்சி: ஸ்ரீவில்லிபுத்தூர் ஆண்டாள் கோயிலில் ஆடிப்பூர தேரோட்டம் நாளை நடைபெறுவதை முன்னிட்டு ஸ்ரீரங்கம் ரங்கநாதர் கோயிலில் இருந்து பட்டு வஸ்திரங்கள் உள்ளிட்ட மங்கல சீர்வரிசை பொருட்கள் இன்று அனுப்பப்பட்டது. ஸ்ரீவில்லிபுத்தூரில் பிறந்த ஆண்டாள், பெருமாள் மீதிருந்த பக்தியால் அவருக்கு பூ மாலை தொடுக்கும் தொண்டு செய்து அவருக்கு மனைவியானாள். ஆண்டாள் மணமுடித்து ஐக்கியமானது திருச்சி ஸ்ரீரங்கம் ரங்கநாதர் கோயிலில் என்பதால் ஸ்ரீவில்லிபுத்தூர் கோயிலுக்கும், ஸ்ரீரங்கம் ரங்கநாதர் கோயிலுக்கும் இடையே சம்பந்தமும், உறவும், மங்கல பொருட்கள் பரிவர்த்தனையும் நெடுங்காலம் இருந்து வருகிறது. ஸ்ரீரங்கம் சித்திரை தேருக்கு முதல் நாள் ஸ்ரீவில்லிபுத்தூரில் இருந்தும், ஸ்ரீவில்லிபுத்தூர் தேரோட்டத்திற்கு முதல் நாள் ஸ்ரீரங்கத்தில் இருந்தும் மங்கல பொருட்கள் வழங்கப்படும்.

அதன்படி இந்த ஆண்டு ஸ்ரீவில்லிபுத்தூர் ஆண்டாள் கோயிலில் ஆடிப்பூர தேரோட்டம் நாளை(22ம் தேதி) நடக்கிறது. இதையொட்டி ஸ்ரீரங்கம் கோயிலில் இருந்து பட்டு வஸ்திரங்கள், மஞ்சள், குங்குமம், சந்தனம், வளையல், பழங்கள், தாம்பூலம் உள்ளிட்ட மங்கல சீர்வரிசை பொருட்கள் சமர்ப்பிக்கப்பட உள்ளன. இதையொட்டி நேற்று மாலை 5 மணியளவில் பட்டு வஸ்திரங்கள், மாலை, பழங்கள் உள்ளிட்ட மங்கள பொருட்கள் ஸ்ரீரங்கம் கோயில் ரங்கவிலாஸ் மண்டபத்தில் பக்தர்கள் பார்வைக்கு வைக்கப்பட்டது.

பின்னர் மங்கல பொருட்கள் யானை மீது வைத்து ஊர்வலமாக கோயிலுக்கு எடுத்து வரப்பட்டது. இதையடுத்து இன்று காலை 6 மணியளவில் ஸ்ரீரங்கம் கோயில் நிர்வாகத்தினரால் இந்த மங்கல பொருட்கள் ஸ்ரீவில்லிப்புத்தூர் ஆண்டாள் கோயிலுக்கு எடுத்து செல்லப்பட்டு அக்கோயில் நிர்வாகத்தினரிடம் சமர்ப்பிக்கப்பட்டது. இந்த வஸ்திரங்களை ஆண்டாள் அணிந்து நாளை நடைபெறும் ஸ்ரீவில்லிபுத்தூர் ஆடிப்பூர தேரோட்டத்தின்போது, தேரில் எழுந்தருளுவார்.

The post ஸ்ரீவில்லிபுத்தூரில் நாளை ஆடிப்பூர தேரோட்டம் ஸ்ரீரங்கத்தில் இருந்து ஆண்டாளுக்கு வஸ்திரங்கள் இன்று அனுப்பி வைப்பு appeared first on Dinakaran.