சென்னை: அடையாறு ஆற்றின் கீழ் 4 சுரங்கம் தோண்டும் இயந்திரங்கள் மூலம் சுரங்கம் தோண்டும் பணிகள் 5 முதல் 6 மாதங்களில் முடிவடையும் என மெட்ரோ நிர்வாக அதிகாரி தகவல் தெரிவித்துள்ளார். சென்னை மெட்ரோ ரயில் திட்டத்தில், 3வது வழித்தடமான 45.8 கி.மீ. தூரம் மாதவரம் பால்பண்ணை முதல் சிப்காட் வரையிலும், 4வது வழித்தடம் 26.1 கி.மீ. கலங்கரை விளக்கம் முதல் பூந்தமல்லி வரையிலும், 5வது வழித்தடமான 47 கி.மீ. தூரம் மாதவரம் முதல் சோழிங்கநல்லூர் வரையிலும் பணிகள் தொடங்கி நடந்து வருகின்றன. இந்த பணிகளை 2026ம் ஆண்டு இறுதிக்குள் முடித்து, மெட்ரோ ரயில்களை இயக்க இலக்கு நிர்ணயிக்கப்பட்டுள்ளது.
இதுகுறித்து மெட்ரோ நிர்வாக அதிகாரி கூறியதாவது: கிரீன்வேஸ் சாலையிலிருந்து அடையாறு ஆற்றின் கீழ் சுரங்கம் தோண்டும் பணிக்காக 4 சுரங்கம் தோண்டும் இயந்திரங்கள் பயன்படுத்தப்படுகிறது. அவற்றில் காவேரி மற்றும் அடையாறு ஆகிய 2 இயந்திரங்கள் அடையாறு பகுதியை நோக்கி சுரங்கப்பாதை அமைக்கும் பணியை செய்ய உள்ளது. மீதமுள்ள நொய்யல் மற்றும் வைகை மந்தைவெளி பகுதியை நோக்கி துளையிடுகிறது. கிரீன்வேஸ் சாலையில் இருந்து காவேரி சுரங்கம் தோண்டும் இயந்திரம் மட்டும் 150 மீட்டர் வேகத்தில் சுரங்கம் தோண்ட தொடங்கப்படும். இருப்பினும் அடையாற்றின் கீழ் சுரங்கப்பணி கடினமாக இருக்கும்.
கிரீன்வேஸ் சாலை மற்றும் அடையாறு நிலையங்களுக்கு இடையே ஒரு கிலோ மீட்டர் தூரம் உள்ளது. இங்கு சுரங்க பாதை அமைப்பது கடினமாக இருக்கும். ஏனெனில் ஆற்றின் படுகையில் எப்போதும் அழுத்த அளவுகள் உள்ளிட்ட மாறுபாடு இருக்கும். இந்த சமயத்தில் ஆற்றில் 3 முதல் 5 மீட்டர் ஆழத்திற்கும், ஆற்றின் படுகைக்கு கீழே 11 – 13 மீட்டர் வரை தோண்டப்பட உள்ளது. இதில் ரயில் மட்டம் 18 மீட்டரில் இருக்கும்.
சில வாரங்களில் சுரங்கம் தோண்டும் இயந்திரம் ஆற்று படுகையை அடையும். இவ்வாறான சவால்கள் நிறைந்த சிறிய நீளமான சுரங்கப்பாதையை முடிக்க 5 முதல் 6 மாதங்கள் ஆகலாம். இருப்பினும் நீருக்கடியில் சுரங்கப்பாதை அமைப்பது என்பது மெட்ரோ நிர்வாகத்திற்கு புதிதான ஒன்று அல்ல என்றார்.
The post 4 இயந்திரங்கள் மூலம் அடையாறு ஆற்றில் சுரங்கம் தோண்டும் பணி 6 மாதங்களில் முடியும்: மெட்ரோ நிர்வாக அதிகாரி தகவல் appeared first on Dinakaran.
