புதுடெல்லி: ஒரே பாலின திருமணம் தொடர்பாக சட்டத்தில் திருத்தம் கொண்டு வருவது குறித்து பரிசீலிக்க வேண்டும் என்று உச்ச நீதிமன்றம் தெரிவித்தது. ஒரே பாலின ஜோடிகள் திருமணம் செய்து கொள்வது தொடர்பான வழக்கு உச்ச நீதிமன்ற தலைமை நீதிபதி டி.ஒய்.சந்திரசூட் தலைமையிலான 5 நீதிபதிகள் கொண்ட அரசியல் சாசன அமர்வு முன்பு விசாரணைக்கு வந்தது. அப்போது மத்தியப் பிரதேசம் சார்பில் ஆஜரான மூத்த வழக்கறிஞர் ராகேஷ் திவேதி, ‘பாரம்பரியம், தனிநபர் சட்டம், மதம் ஆகியவற்றின்படி திருமணம் செய்துகொள்ள, மாற்று பாலின தம்பதிகளுக்கு உரிமை உண்டு. அதே சமயம் ஓரினச்சேர்க்கை திருமணத்திற்கான சட்டத்தை இயற்றும் முடிவை நாடாளுமன்றத்திற்கு விட்டுவிட வேண்டும்’ என்று வாதிட்டார்.
அப்போது நீதிபதிகள் கூறியதாவது: திருமணத்தை ஒழுங்குபடுத்துவதில் அரசுக்கு உரிய கடமை உள்ளது என்பதை மறுக்க முடியாது. ஆனால் திருமணம் என்பது அரசியலமைப்பு பாதுகாப்பிற்கு உரிமையுள்ள ஒன்று. அது வெறும் சட்டப்பூர்வ அங்கீகாரம் மட்டுமல்ல என்ற அடிப்படைக் கருத்தையும் நாம் ஏற்க வேண்டும். முன்பு மாற்று ஜாதிகளுக்கு இடையேயான திருமணங்கள் அனுமதிக்கப்படவில்லை. பிறமதங்களுக்கு இடையேயான திருமணங்கள் கேள்விப்பட்டிருக்கவில்லை. எனவே அரசியலமைப்புச் சட்டமே ஒரு பாரம்பரியத்தை உடைப்பதாகும். ஏனென்றால் முதல் முறையாக நீங்கள் 14வது பிரிவைக் கொண்டு வந்துள்ளீர்கள். எனவே நீங்கள் 14, 15 மற்றும் மிக முக்கியமாக 17ஐக் கொண்டு வந்திருந்தால், அந்த மரபுகள் உடைக்கப்படுகின்றன.
ஆனால் நீங்கள் சொன்ன திருமணம் என்ற கருத்தாக்கம் உருவாகியுள்ளது என்பதை இந்த வழக்கில் நாங்கள் நிச்சயமாக வலியுறுத்துவோம். அரசியலமைப்புச் சட்டத்தின்படி திருமணம் செய்துகொள்ள உரிமை இல்லை என்று கூறுவது தவறானது. திருமணம் என்பது இரண்டு தனிமனிதர்கள் ஒன்றாக வாழ்வதற்கான உரிமையை முன்வைக்கிறது. திருமணம் என்பது ஒரு குடும்பம். ஒரு திருமணத்தில் ஒன்றாக வரும் இருவர் ஒரு குடும்பத்தை உருவாக்குகிறார்கள். திருமணத்தில் பங்கேற்றவர்கள் குழந்தை பெற விரும்பாவிட்டால் அல்லது குழந்தைகளைப் பெற முடியாத வயதில் திருமணம் செய்து கொள்ளுபவர்களை அங்கீகரிப்பது இல்லையா. எனவேஒரே பாலின ஜோடிகள் திருமணம் தொடர்பாக நாடாளுமன்றம் திருமண சட்டத்தை மறுவரையறை செய்யலாம். இவ்வாறு அவர்கள் தெரிவித்தனர்.
The post ஒரே பாலின திருமணம் சட்டத்தில் திருத்தம் தேவை: உச்ச நீதிமன்றம் கருத்து appeared first on Dinakaran.
