கூடுவாஞ்சேரி, ஏப். 6: தினகரன் செய்தி எதிரொலியால் நந்திவரம்-கூடுவாஞ்சேரி நகராட்சியில் தார் சாலை அமைக்கும் பணி தீவிரமாக நடைபெற்று வருகிறது. நந்திவரம்-கூடுவாஞ்சேரி நகராட்சியில் 30 வார்டுகள் உள்ளன. இங்கு ஒரு லட்சத்துக்கும் அதிகமானோர் வசித்து வருகின்றனர். இந்நிலையில், பழைய பேரூராட்சி அலுவலகத்திற்கு செல்லும் பிரதான சாலையில், சாலை அமைப்பதற்காக ஜல்லி கற்கள் பரப்பி 2 வாரத்துக்கு மேலாகியும் இதுவரை, தார் சாலை அமைக்கவில்லை. இதனால், அனைத்து தரப்பு மக்கள் கடும் அவதிப்பட்டு வந்தனர். எனவே, மேற்படி பணியை துரிதப்படுத்த வேண்டும் என நகராட்சி நிர்வாகத்திற்கு பொதுமக்கள் மற்றும் சமூக ஆர்வலர்கள் வலியுறுத்தி வந்தனர்.
இதுகுறித்து, சம்பந்தப்பட்ட நகராட்சி நிர்வாகம் தலையிட்டு மேற்படி பணியை போர்க்கால அடிப்படையில் விரைந்து முடிக்க வேண்டும் என்று பொதுமக்கள் மற்றும் சமூக ஆர்வலர்கள் வலியுறுத்தினர். இது சம்மந்தமாக, கடந்த 25ம் தேதி தினகரனில் படத்துடன் செய்தியாக வெளியானது. அதன் எதிரொலியாக 10, 15 மற்றும் 11வது வார்டு பகுதிகளை இணைக்கும் மேற்படி பகுதிகளில் ₹20 லட்சம் மதிப்பீட்டில் தார்சாலை அமைக்கும் பணி நேற்று காலை முதல் தீவிரமாக நடைபெற்று வருகின்றனர். இதனால், பள்ளி மாணவர்கள் உட்பட அனைத்து தரப்பு பொதுமக்களும் மகிழ்ச்சி அடைந்துள்ளனர். மேலும், மேற்படி சாலை அமைக்கும் பணியை நகர மன்ற தலைவர் எம்.கே.டி.கார்த்திக்தண்டபாணி நேரில் சென்று ஆய்வு செய்தார்.
The post நந்திவரம்-கூடுவாஞ்சேரியில் தார் சாலை அமைக்கும் பணி தீவிரம் appeared first on Dinakaran.
