தடுமாற்றம் இல்லா பயணம் விழுதலைத் தவிர்ப்போம்!

நன்றி குங்குமம் டாக்டர்

முதுமையில் இளமை

முதுமையில் ‘விழுதல்’ (Falls) என்பது தற்செயலாக நடக்கும் ஒரு சாதாரண விபத்து அல்ல; அது ஒரு முதியவரின் ஒட்டுமொத்த சுதந்திரத்தையும், கம்பீரமான வாழ்வையும் ஒரே நொடியில் கேள்விக்குறியாக்கக்கூடிய ஒரு பெரும் மருத்துவ சவால். மருத்துவப் புள்ளிவிவரங்களின்படி, 60 வயதைக் கடந்தவர்களில் மூன்றில் ஒருவர் ஆண்டுக்கு ஒருமுறையாவது கீழே விழுகிறார்கள். இதில் வேதனை என்னவென்றால், பெரும்பாலான விழுதல்கள் பொது இடங்களை விட, அவர்கள் மிகவும் பாதுகாப்பாக உணரும் வீடுகளுக்குள்ளேயேதான் நடக்கின்றன.

ஒருமுறை கீழே விழுந்துவிட்டால், அது உடல் ரீதியான காயங்களை (எலும்பு முறிவு போன்றவை) ஏற்படுத்துவதுடன் நின்றுவிடுவதில்லை. மீண்டும் விழுந்துவிடுவோமோ என்ற ஒருவித உளவியல் பயத்தை (Fear of Falling) மனதிற்குள் விதைத்துவிடுகிறது. இந்த பயத்தினால் முதியவர்கள் தங்களின் நடமாட்டத்தைக் குறைத்துக் கொள்கிறார்கள்; நடமாட்டம் குறையும்போது தசைகள் மேலும் பலவீனமடைந்து, மீண்டும் விழும் அபாயம் இருமடங்காகிறது. இந்த ஆபத்தான சுழற்சியை உடைக்க வேண்டுமானால், ‘முதியோர் சமநிலை’ (Geriatric Balance) என்றால் என்ன என்பதை நாம் ஆழமாகப் புரிந்துகொள்ள வேண்டும்.

உடலின் சமநிலை (Balance) எவ்வாறு செயல்படுகிறது?

நாம் நேராக நிற்பதற்கும், தடுமாறாமல் நடப்பதற்கும் நமது உடலில் மூன்று முக்கிய மண்டலங்கள் ஒரு நொடி கூட ஓய்வில்லாமல், ஒருங்கிணைந்து செயல்பட வேண்டும். இதனை ‘முப்பரிமாண பாதுகாப்பு அரண்’ என்று கூறலாம்:

கண் பார்வை (Visual System): நாம் எந்தத் தளத்தில் நடக்கிறோம், தரை சமமாக இருக்கிறதா, முன்னால் என்ன தடை உள்ளது என்பதை மூளைக்குக் காட்டும் முதன்மை
ஜன்னல் இது.

உட்புறக் காது (Vestibular System): நமது உட்புறக் காதில் ஒரு பிரத்யேகத் திரவம் உள்ளது. நமது தலை எந்தக் கோணத்தில் திரும்புகிறது, உடல் நேராக இருக்கிறதா அல்லது சாய்வாக இருக்கிறதா என்பதை மூளைக்குத் துல்லியமாகத் தெரிவிக்கும் ‘ஜிப்ஸம்’ (Gyroscope) போல இது செயல்படுகிறது.

உடல் நிலை உணர்வு நரம்பு கள் (Proprioception): நமது பாதங்களின் அடியில் உள்ள நுண்ணிய நரம்பு முனைகள், நாம் நிற்கும் தரை சொரசொரப்பாக இருக்கிறதா, வழுக்குகிறதா அல்லது மெத்தென்றிருக்கிறதா என்ற தகவலை நொடிப் பொழுதில் மூளைக்கு அனுப்புகின்றன.

முதுமையில் சமநிலை ஏன் குறைகிறது?

வயது ஏறும்போது, மேலே குறிப்பிட்ட மூன்று மண்டலங்களிலும் இயற்கையான தேய்மானங்கள் ஏற்படுகின்றன:
[கண் பார்வை மங்குதல்] + [காதுத் திரவ மாறுபாடு] + [பாத நரம்புகள் மந்தமாதல்]
[மூளையின் தகவல் பரிமாற்றத் தாமதம்]
[தடுமாற்றம் மற்றும் விழுதல்]

கண்புரை (Cataract) போன்ற பாதிப்புகளால் ஆழத்தை கணிக்கும் திறன் (Depth Perception) குறையும்போது படிக்கட்டுகளில் தடுமாற்றம் ஏற்படுகிறது. அதேபோல, பாத நரம்புகள் மந்தமாவதால் தரைப்பகுதியின் சமநிலையை மூளையால் உடனடியாகக் கணிக்க முடிவதில்லை.இதனுடன் ‘சார்கோபீனியா’ எனப்படும் தசைநார்களின் பலவீனமும் சேரும்போது, ஒரு சிறிய தரை மேடு தட்டினால் கூட, உடலைத் தாங்கிப் பிடிக்கும் சக்தி இல்லாமல் முதியவர்கள் கீழே விழ நேரிடுகிறது. முதியோர் சமநிலையின் இரண்டு முக்கிய வகைகள் (Types of Balance)

நமது உடல் இரண்டு நிலைகளில் தன்னைச் சமன்படுத்திக் கொள்கிறது:

நிலையான சமநிலை (Static Balance)

நாம் ஒரே இடத்தில் அசையாமல் நிலையாக இருக்கும்போது உடலை விழாமல் தாங்கிப் பிடிக்கும் திறன் இதுவாகும்.அன்றாட உதாரணங்கள்: நேராக ஒரே இடத்தில் நின்று கொண்டிருப்பது, நாற்காலியில் நிமிர்ந்து அமர்ந்திருப்பது அல்லது குளிக்கும்போது அசையாமல் நிற்பது.முதுமையில் இதன் பாதிப்பு: நிலையான சமநிலை குறையும்போது, முதியவர்களால் நீண்ட நேரம் ஒரே இடத்தில் நிற்க முடியாது. உடல் ஒரு பக்கமாகச் சாயத் தொடங்கும். நாற்காலியில் அமர்ந்திருக்கும் போது கூட முதுகுத்தண்டு வளைந்து, பக்கவாட்டில் சரிந்து விடுவார்கள்.

இயக்கச் சமநிலை (Dynamic Balance)

உடல் ஒரு இயக்கத்தில் இருக்கும்போது அல்லது நகர்ந்து கொண்டிருக்கும்போது புவியீர்ப்பு விசைக்கு (Gravity) எதிராக உடலை நிலைநிறுத்தும் திறன் இதுவாகும்.அன்றாட உதாரணங்கள்: நடப்பது, படிக்கட்டுகளில் ஏறி இறங்குவது, தரையில் கிடக்கும் ஒரு பொருளைக் குனிந்து எடுப்பது, திடீரெனத் திரும்பிப் பார்ப்பது.முதுமையில் இதன் பாதிப்பு: இயக்கச் சமநிலை பாதிக்கப்படும்போதுதான் பெரும்பாலான விபத்துகள் நடக்கின்றன. நடக்கும்போது கால்கள் ஒன்றோடொன்று பின்னுவது, திரும்பும்போது தலைசுற்றல் ஏற்பட்டு நிலைதடுமாறுவது, குனியும்போது அப்படியே முன்னோக்கி விழுவது போன்றவை இதன் வெளிப்பாடுகள் ஆகும்.

சமநிலை இழப்பு முதியவர்களிடம் ஏற்படுத்தும் தாக்கங்கள் (Effects of Balance Loss)

முதுமையில் ஏற்படும் சமநிலை இழப்பு என்பது வெறும் உடல் சார்ந்த தடுமாற்றம் மட்டுமல்ல; அது ஒரு முதியவரின் ஒட்டுமொத்த வாழ்க்கைத் தரத்தையே தலைகீழாக மாற்றக்கூடிய ஒரு பெரும் சவாலாகும். உடல் ரீதியாகப் பார்க்கும்போது, சமநிலை குறைபாட்டினால் ஏற்படும் வீழ்ச்சிகள் இடுப்பு எலும்பு முறிவு (Hip Fracture), மணிக்கட்டு மற்றும் தலைக் காயங்கள் போன்ற தீவிரமான பாதிப்புகளுக்கு வழிவகுக்கின்றன. இந்த எலும்பு முறிவுகள் முதியவர்களை நீண்ட காலத்திற்குப் படுக்கையிலேயே முடக்கி, அவர்களின் தசை வலிமையை மேலும் சிதைத்துவிடுகின்றன (Muscle Atrophy).

மறுபுறம், இதன் உளவியல் மற்றும் சமூகத் தாக்கங்கள் இன்னும் ஆழமானவை. ஒருமுறை நிலைதடுமாறி விழுந்த முதியவருக்கு, மீண்டும் விழுந்துவிடுவோமோ என்ற அதீத அச்சம் (Fear of Falling) மனதிற்குள் குடியேறிவிடுகிறது. இந்த பயத்தின் காரணமாக அவர்கள் தங்களின் அன்றாட நடமாட்டங்களைச் சுருக்கிக் கொண்டு, குளிப்பது, கழிவறைக்குச் செல்வது போன்ற சுயத் தேவைகளுக்கும் பிறரைச் சார்ந்திருக்கும் (Dependency) நிலைக்குத் தள்ளப்படுகிறார்கள்.

இது அவர்களின் சுய மரியாதையைப் பாதிப்பதோடு, பூங்காக்களுக்குச் செல்வது, நண்பர்களைச் சந்திப்பது போன்ற சமூகத் தொடர்புகளையும் துண்டித்து, நான்கு சுவற்றுக்குள் அவர்களைத் தனிமைப்படுத்துகிறது. இந்தத் தனிமையும், தன்மீதான நம்பிக்கையிழப்பும் இறுதியில் அவர்களைத் தீவிர மனச்சோர்விற்குள் (Geriatric Depression) தள்ளிவிடுகிறது. எனவே, சமநிலை இழப்பு என்பது ஒரு முதியவரின் சுதந்திரத்தையும் கம்பீரத்தையும் பறிக்கும் ஒரு சங்கிலித் தொடர் எதிர்வினையாகும்.

ஒரு நபருக்குச் சமநிலை குறைபாடு (Balance Disorder) உள்ளதா என்பதை ஆரம்பத்திலேயே கண்டறிய உதவும் மிக முக்கியமான 6 மருத்துவ அறிகுறிகள் (Symptoms) இதோ:

1. தலைச்சுற்றல் அல்லது சுழற்சி உணர்வு (Vertigo)

சுற்றியுள்ள பொருட்கள் அனைத்தும் தன்னைச் சுற்றி வேகமாகச் சுழல்வது போன்ற உணர்வு ஏற்படுவது இதன் முதன்மை அறிகுறியாகும். படுக்கையிலிருந்து திடீரெனத் திரும்பும்போதோ அல்லது நிமிர்ந்து பார்க்கும்போதோ இந்தத் தலைச்சுற்றல் அதிகமாகும். இது பெரும்பாலும் உட்புறக் காதில் உள்ள திரவ மாறுபாட்டால் (Vestibular system) ஏற்படுகிறது.

2. நிலைதடுமாற்றம் மற்றும் வளைந்து நடத்தல் (Unsteadiness)

நேர்க்கோட்டில் நேராக நடக்க முடியாமல், மது அருந்தியவர் போல ஒரு பக்கமாகச் சரிந்து அல்லது வளைந்து நடப்பது. நடக்கும்போது தரைப்பகுதியின் சமநிலையை பாதங்களால் சரியாகக் கணிக்க முடியாததே இதற்குக் காரணம்.

3. மயக்கம் போன்ற உணர்வு (Lightheadedness / Presyncope)

திடீரெனக் கண்கள் இருட்டிக்கொண்டு வருவது அல்லது அப்படியே மயங்கி விழுந்துவிடுவோம் போன்ற ஒரு மிதக்கும் உணர்வு (Floating sensation) ஏற்படுவது. படுக்கை அல்லது நாற்காலியிலிருந்து சட்டென்று எழும்போது இந்தத் தற்காலிக மயக்கம் வரலாம்.

4. பார்வைத் தடுமாற்றம் (Visual Disorientation)

நடக்கும்போது தன் கண் முன்னால் இருக்கும் பொருட்கள் அனைத்தும் அசைவது போன்றோ அல்லது மங்குவது போன்றோ தோன்றும். இதனால் முதியவர்களால் படிக்கட்டுகளின் ஆழத்தையோ அல்லது தரையில் இருக்கும் தடைகளையோ சரியாகக் கணிக்க முடியாமல் தடுமாறுவார்கள்.

5. அடிக்கடி இடறி விழுதல் (Frequent Trips or Falls)

தரையில் எந்தப் பெரிய தடையும் இல்லாதபோதும், கால்கள் ஒன்றோடொன்று பின்னி அடிக்கடி நிலைதடுமாறுவது அல்லது லேசான தரை மேடுகளில் கூட நிலைதடுமாறி கீழே
விழுவது.

6. இடஞ்சார்ந்த குழப்பம் (Spatial Disorientation)

நாம் எங்கே நிற்கிறோம், எந்தக் கோணத்தில் நம் உடல் நகர்கிறது என்பதை மூளையால் உடனடியாகப் புரிந்துகொள்ள முடியாமல் ஒருவித குழப்பமுடனும் அச்சத்துடனும் நடப்பது.
முக்கியக் குறிப்பு: இந்த அறிகுறிகள் தற்காலிகமாக இல்லாமல் தொடர்ந்து நீடித்தால், அது நரம்பியல் அல்லது உட்புறக் காது சார்ந்த பாதிப்பின் எச்சரிக்கையாக இருக்கலாம். உடனடியாக ஒரு பிசியோதெரபிஸ்ட் அல்லது மருத்துவரை அணுகி ஆலோசிப்பது அவசியம்.

– தொடரும்

தொகுப்பு: இயன்முறை மருத்துவர் நித்யா மூர்த்தி