கனிமொழி எம்பி பேட்டி திமுக கூட்டணி நிச்சயம் சிறப்பான ஒரு வெற்றியை பெறும்

சென்னை: திமுக கூட்டணி நிச்சயம் சிறப்பான ஒரு வெற்றியை பெறும் என்று கனிமொழி எம்பி கூறியுள்ளார்.  சென்னை மைலாப்பூரில் சி.எஸ்.ஐ.செயின்ட் எப்பாஸ் மேல்நிலைப் பள்ளியில், சேப்பாக்கம்- திருவல்லிக்கேணி தொகுதிக்கு உட்பட்ட வாக்குசாவடியில், திமுக துணை பொதுச் செயலாளர் கனிமொழி எம்பி வாக்கு செலுத்தினார். பின்னர் கனிமொழி எம்பி அளித்த பேட்டி:

மக்கள் நிச்சயமாக ஒரு தெளிவான முடிவை எடுப்பார்கள். நான் மக்களை தொடர்ந்து சந்தித்ததன் அடிப்படையில் சொல்கிறேன். உறுதியாக திமுக ஆட்சி தொடரும் என்று மிகவும் நம்புகிறேன். நான் இத்தனை தொகுதிகள் நிச்சயமாக வெல்வோம் என்ற எண்ணிக்கைக்குள் போக விரும்பவில்லை.

ஆனால் திமுக கூட்டணி நிச்சயம் சிறப்பான ஒரு வெற்றியை பெறும். தவெக விஜய்யின் பின்னால் பெரும்பாலான இளைஞர்கள் இருக்கிறார்களா? என்பது வாக்கு எண்ணும் நாளில் இதன் உண்மை என்ன என்பது நம் அனைவருக்கும் தெரியவரும் . 1971க்கு பிறகு திமுக தொடர்ந்து இரண்டாவது முறை ஆட்சிக்கு வந்ததாக வரலாறு இல்லை என்று சொல்கிறார்கள். நிச்சயம் வரலாறு மீண்டும் திரும்பும். இவ்வாறு அவர் கூறினார்.