மும்பை: மேற்காசிய போரினால் கச்சா எண்ணெய் விலை உயர்வு காரணமாக இந்திய பங்கு சந்தையில் ஒரே நாளில் ரூ.12 லட்சம் கோடி இழப்பு ஏற்பட்டுள்ளது. இந்திய பங்குச்சந்தையில் நேற்று உள்நாட்டு முதலீட்டாளர்கள் மற்றும் வெளிநாட்டு முதலீட்டாளர்கள் என அனைத்து தரப்புகளும் கடுமையான சரிவை சந்தித்தன, கடந்த மூன்று நாட்களாக தொடர்ந்த உயர்வு திடீரென முறிந்தது.
வளைகுடாவில் உள்ள முக்கிய எரிசக்தி ஆலைகளை ஈரான் தாக்கியதால், பிரென்ட் கச்சா எண்ணெய் ஒரு பீப்பாய்க்கு 110 டாலராக உயர்ந்தது. வெளிநாட்டு நிதி வெளியேற்றம் தடையின்றித் தொடர்ந்ததால், பலவீனமான உலகளாவிய போக்குகளும் சந்தைகளில் தாக்கத்தை ஏற்படுத்தின. 30 பங்குகளைக் கொண்ட சென்செக்ஸ் சுமார் 2,496 புள்ளிகள் சரிந்து 74,207 புள்ளிகளில் நிலைபெற்றது. அதே நேரத்தில், 50 பங்குகளைக் கொண்ட நிப்டி 775 புள்ளிகள் சரிந்து, 23,000 என்ற உளவியல் அளவுகோலுக்கு சற்று மேலே 23,002 புள்ளிகளில் நிலைபெற்றது.
இந்த திடீர் வீழ்ச்சியின் விளைவாக, மும்பை பங்குச்சந்தையில் பட்டியலிடப்பட்ட நிறுவனங்களின் மொத்த சந்தை மதிப்பு ரூ.439 லட்சம் கோடியில் இருந்து ரூ.427 லட்சம் கோடியாக குறைந்தது. இதனால் ஒரே நாளில் ரூ.12 லட்சம் கோடிக்கும் அதிகமான சந்தை மதிப்பு இழப்பு ஏற்பட்டுள்ளது.
