தேவையான பொருட்கள்:
பரங்கிக்காய் – 1 கப் (துருவியது அல்லது சிறு துண்டுகளாக நறுக்கியது), பாசிப்பருப்பு – ¼ கப், வெல்லம் – ¾ கப் (அளவு இனிப்புக்கு ஏற்ப மாற்றலாம்), தேங்காய்ப் பால் – 1 கப் (கட்டியான பால்), ஏலக்காய் பொடி – ¼ டீஸ்பூன். முந்திரி – 8-10, திராட்சை – 1 டேபிள்ஸ்பூன். நெய் – 2 டேபிள்ஸ்பூன், தண்ணீர் – தேவையான அளவு.
செய்முறை:
பாசிப் பருப்பை லேசாக வறுத்து, 1 கப் தண்ணீர் சேர்த்து நன்றாக மிருதுவாக வேகவைக்கவும். பரங்கிக்காயை சிறிது தண்ணீர் சேர்த்து நன்றாக மென்மையாக வேகவைத்து, விருப்பமெனில் மசித்துக் கொள்ளலாம்.
வெல்லத்தை சிறிது தண்ணீரில் கரைத்து வடிகட்டிக் கொள்ளவும். வேக வைத்த பாசிப்பருப்பு மற்றும் பரங்கிக்காய் சேர்த்து கலக்கவும். அதில் கரைத்த வெல்லச்சாறு சேர்த்து மிதமான தீயில் 5-7 நிமிடம் கொதிக்க விடவும்.
இறுதியாக தேங்காய்ப் பால் மற்றும் ஏலக்காய்ப் பொடி சேர்த்து 2 நிமிடம் மட்டும் மிதமாக சூடுபடுத்தவும். ஒரு கடாயில் நெய் சூடு செய்து முந்திரி, திராட்சை வறுத்து பாயசத்தில் சேர்க்கவும்.
அதிக சுவைக்காக சிறிது சுக்குப் பொடி சேர்க்கலாம். கேரளா ஸ்டைலில் செய்யும்போது முதல், இரண்டாம் தேங்காய்ப் பால் தனித்தனியாக சேர்த்தால் ருசி அதிகரிக்கும். சூடாகவும் அல்லது லேசாக குளிரவைத்தும் பரிமாறலாம்.
பரங்கிக்காய் பயன்கள்
கண் பார்வைக்கு நல்லது. பரங்கிக்காயில் வைட்டமின் ஏ அதிகம் உள்ளது. இது கண் பார்வையை பாதுகாக்கவும், இரவு பார்வை குறைபாடு வராமல் தடுக்கவும் உதவும்.
*நோய் எதிர்ப்பு சக்தி அதிகரிக்கும். வைட்டமின் சி மற்றும் ஆன்டி-ஆக்ஸிடன்ட்கள் உள்ளதால் உடல் எதிர்ப்பு சக்தியை உயர்த்தும். குறைந்த கலோரி, அதிக நார்ச்சத்து. வயிறு நிறைவாக இருக்கும் உணர்வு தரும்.
*பீட்டா கரோட்டீன் நிறைந்ததால் சரும ஆரோக்கியத்திற்கு உதவும். வயது மூப்பு சருமப் பிரச்னைகளை சரி செய்யும். பொட்டாசியம் ரத்த அழுத்தம் கட்டுப்பாட்டில் இருக்கும். செரிமானத்திற்கு நல்லது.
*நார்ச்சத்து அதிகம் இருப்பதால் மலச்சிக்கல் பிரச்னை குறையும்.
– ஹேமலதா வாசுதேவன்.
