சென்னை: சென்னையில் இருந்து மதுரை, திருச்சிக்கு இயக்கப்பட்டு வந்த இண்டிகோ ஏர்லைன்ஸ் சிறிய ரக (ஏடிஆர்) விமான சேவை நிறுத்தப்பட்டு மாற்றும் நடவடிக்கையாக ஏ20 ரக பெரிய விமானங்கள் இயக்கபடுகிறது. இண்டிகோ ஏர்லைன்ஸ் விமான நிறுவனம் சென்னை- திருச்சி இடையே காலை 6 மணி முதல் இரவு 9 மணி வரையில், தினமும் 6 விமானங்களையும், திருச்சி-சென்னை இடையே 6 விமானங்கள் என 12 ஏடிஆர் எனப்படும் சிறிய ரக விமானங்களை இயக்கியது. சென்னை- மதுரை இடையே தினமும் காலை முதல் இரவு வரை 8 விமானங்களும், மதுரை – சென்னை இடையே 8 விமானங்கள் என மொத்தம் 16 ஏடிஆர் ரக விமானங்கள் இயக்கப்பட்டன.
இந்நிலையில், இண்டிகோ ஏர்லைன்ஸ் விமான நிறுவனம், நேற்று முன்தினம் இரவு முதல் திருச்சி, மதுரைக்கு இயக்கப்பட்டு வந்த அனைத்து ஏடிஆர் ரக விமானங்களையும் ரத்து செய்துவிட்டு, அதற்கு பதிலாக, நேற்று முதல் திருச்சி, மதுரைக்கு ஏ20 ரக பெரிய விமானங்களை இயக்கத் தொடங்கியுள்ளது. இந்த பெரிய ரக விமானங்களில் ஒரே நேரத்தில் 180லிருந்து 184 பயணிகள் வரை பயணிக்க முடியும். அதோடு ஏடிஆர் ரக விமானங்களில் எக்கனாமி என்ற சாதாரண சீட்டுகள் மட்டுமே இருந்தன. ஆனால் தற்போதைய பெரிய ரக விமானங்களில் பிசினஸ் கிளாஸ் முதல் வகுப்பு இருக்கைகள் மற்றும் சாதாரண இருக்கைகளும் இருக்கும்.
சென்னை- திருச்சி இடையே, காலை 9.10 மணிக்கும், மாலை 4.30 மணிக்கு இரண்டு விமானங்கள் மட்டும் இயக்கப்படுகின்றன. அதேபோல், திருச்சி- சென்னை இடையே, பகல் 11.45 மணி, இரவு 7 மணிக்கும் 2 விமானங்கள் மட்டுமே இயக்கப்படுகின்றன. சென்னை – மதுரை இடையே காலை 6.10 மணி, பகல் 12.15 மணி, இரவு 8.05க்கு என 3 விமானங்களும், மதுரை- சென்னை இடையே, காலை 9.20 மணி, மாலை 3.25 மணி, இரவு 11.30 மணி என 3 விமானங்கள் மட்டுமே இயக்கப்படுகின்றன.
இந்த புதிய முறையை இண்டிகோ ஏர்லைன்ஸ் விமான நிறுவனம், நேற்று முதல் சென்னை விமான நிலையத்தில் இருந்து செயல்படுத்த தொடங்கியுள்ளது. ஆனால் இது சோதனை அடிப்படையில் நடப்பதாகவும், இம்மாதம் டிசம்பர் 31ம் தேதி வரை இந்த முறையை செயல்படுத்தி பார்த்துவிட்டு, பயணிகள் வரவேற்பை பொறுத்து, தொடர்ந்து நீட்டிக்கப்படுவதற்கு வாய்ப்பு உள்ளதாகவும் கூறப்படுகிறது.
