டெல்லி: நீண்டகால போருக்கு தயாராக இருக்கவேண்டும் என்று பாதுகாப்புத் துறை அமைச்சர் ராஜ்நாத் சிங் ராணுவத்துக்கு அறிவுறுத்தி உள்ளார். மத்தியப் பிரதேசத்தில் நடைபெற்ற ராணுவ நிகழ்ச்சியில் கலந்துகொண்டு பேசிய ராஜ்நாத் சிங், 5 ஆண்டுகள் கூட போர் நீடிக்கலாம், அதற்கும் ராணுவம் தயாராக இருக்க வேண்டும். இன்றைய யுகத்தில் போர்கள் கணிக்க முடியாத வகையில் திடீர் திடீரென நடக்கின்றன. ராணுவ வீரர்களின் எண்ணிக்கையும் ஆயுதங்களும் மட்டுமே இனி வரும் காலங்களில் போதுமானதாக இருக்காது.
சைபர் யுத்தம், செயற்கை நுண்ணறிவு, ஆளில்லா வான்வழி ட்ரோன்கள் மற்றும் செயற்கைக்கோள் அடிப்படையிலான கண்காணிப்பு ஆகியவையே எதிர்காலப் போர்களை வடிவமைக்க உள்ளன. புதிய தொழில்நுட்பங்கள் போரின் தன்மையை மாற்றியமைத்துள்ளதால், குறுகிய மற்றும் நீண்ட போர்களுக்கு இந்தியா தயாராக இருக்க வேண்டும். நவீன போர்கள் இனி நிலம், கடல் மற்றும் வான்வெளியுடன் மட்டும் கட்டுப்படுத்தப்படாது.
இனி அவை விண்வெளி மற்றும் சைபர்ஸ்பேஸ் வரை விரிவடையும் என்று தெரிவித்தார். தொழில்நுட்பம், ஒரு புதுமையை முழுமையாகப் புரிந்துகொள்ளும் நேரத்தில், இன்னொன்று உருவாகி, போரின் போக்கையே முற்றிலுமாக மாற்றும் அளவுக்கு உலகம் வேகமாக முன்னேறி வருகிறது. செயற்கைக்கோள் அமைப்புகள், செயற்கைக்கோள் எதிர்ப்பு ஆயுதங்கள் மற்றும் விண்வெளி கட்டுப்பாட்டு மையங்கள் ஆகியவை அதிகாரத்தின் புதிய கருவிகளாகும். இவ்வாறு பேசினார்.
