கூலி தொழிலாளி தற்கொலை

காரைக்கால், மே 26: காரைக்கால் நெடுங்காட்டில், மது அருந்த பணம் தராததால், கூலி தொழிலாளி தூக்குபோட்டு தற்கொலை செய்துகொண்டார்.காரைக்கால் நெடுங்காடு மேலகாசாகுடியை சேர்ந்தவர் நாகராஜ்( 60), கூலி தொழிலாளி.  இவர், ஊதியம் முழுவதையும் மது அருந்தி வந்ததாக கூறப்படுகிறது. மது அருந்த பணம் இல்லாதபோது, வீட்டில் பணம் கேட்டு தொந்தரவு செய்து வந்ததாக கூறப்படுகிறது.

நேற்று முன்தினம் வழக்கம்போல், மது அருந்த குடும்பத்தினரிடம் பணம் கேட்டுள்ளார். யாரும் பணம் தரவில்லை. இதனால் மனவேதனையில் இருந்துவந்த நாகராஜ், நேற்று முன்தினம் இரவு, வீட்டு கொல்லையில் இருந்த, மரம் ஒன்றில் தூக்கு போட்டு தற்கொலை செய்துகொண்டார்.  இதுகுறித்து உறவினர்கள் நெடுங்காடு போலீஸ் நிலையத்தில் புகார் கொடுத்தனர். அதன் பேரில் போலீசார் வழக்கு பதிவு செய்து விசாரித்து வருகின்றனர்.