நாகை மாவட்டத்தை சேர்ந்தவர்கள் புனித பயணம் மேற்ெகாள்ள விண்ணப்பிக்கலாம்

நாகப்பட்டினம், ஜூலை17: நாகப்பட்டினம் மாவட்டத்தை சேர்ந்த புத்த மதத்தினர், சமண மதத்தினர் மற்றும் சீக்கிய மதத்தினர் இந்தியாவில் உள்ள அவரவர் மதங்களுக்கான புனித தலங்களுக்கு புனித பயணம் மேற்கொள்ள விண்ணப்பிக்கலாம் என கலெக்டர் ஆகாஷ் தெரிவித்துள்ளார். தமிழ்நாட்டை சேர்ந்த 50 புத்த மதத்தினர், 50 சமண மதத்தினர் மற்றும் 20 சீக்கிய மதத்தினர் இந்தியாவில் உள்ள அவரவர் மதங்களுக்கான புனித தலங்களுக்கு புனித பயணம் மேற்கொள்வதற்காக தமிழக அரசால் ஆண்டுதோறும் நபர் ஒருவருக்கு ரூ.10 லட்சம் -வீதம் 120 நபர்களுக்கு நிதி உதவி வழங்கி வருகிறது.

எனவே இந்த திட்டத்தின் கீழ் பயன்பெற விரும்பும் புத்த, சமண மற்றும் சீக்கியர்களிடமிருந்து விண்ணப்பங்கள் வரவேற்கப்படுகிறது. இப்புனித பயணம் புத்த மத தொடர்புடைய பீகாரில் உள்ள புத்த கயா, உத்திரபிரதேசத்தில் உள்ள குசிநகர், வாரணாசியில் உள்ள சாரநாத்கோவில், பீகாரில் உள்ள ராஜ்கிர், வைஷாலி, நேபாளத்தில் உள்ள லும்பினி போன்ற புனித தலங்களுக்கு செல்ல முடியும். சமண மத தொடர்புடைய ராஜஸ்தானில் உள்ள தில்வாரா கோவில், ரணக்பூர் சமண கோவில், ஜெய்சால்மர் சமண கோவில், ஜார்கண்டில் உள்ள சிக்கர்ஜி, குஜராத்தில் உள்ள பாலிடனா, பீகாரில் உள்ள பவபுரி சமண கோவில், கர்நாடகாவில் சரவணபெலகோலா போன்ற புனித தலங்களுக்கு செல்ல முடியும். சீக்கிய மத தொடர்புடைய பஞ்சாப்பில் உள்ள அமிர்தசரஸ், பாகிஸ்தானிலுள்ள குருத்வாரா  நான்காணா சாகிப் போன்ற புனித தலங்களுக்கு செல்ல முடியும். எனவே நாகப்பட்டினம் மாவட்டத்தை சேர்ந்தவர்களுக்கு நேரடியாக மானியம் வழங்கப்படும்.

இதற்கான விண்ணப்ப படிவங்களை நாகப்பட்டினம் கலெக்டர் அலுவலகத்தில் இயங்கும் மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்திலிருந்து கட்டணமின்றி பெறலாம். மேலும் www.bcmbcmw.tn.gov.in இணையதளத்திலிருந்து பதிவிறக்கம் செய்து கொள்ளலாம். பூர்த்தி செய்த விண்ணப்பத்தை நவம்பர் மாதம் 30ம் தேதிக்குள் உரிய ஆவணங்களுடன் ஆணையர், சிறுபான்மையினர் நலத்துறை, கலசமஹால் பாரம்பரிய கட்டடம், முதல் தளம்,, சேப்பாக்கம், சென்னை-600 005 என்ற முகவரிக்கு அனுப்பி வைக்க வேண்டும் என தெரிவித்துள்ளார்.

The post நாகை மாவட்டத்தை சேர்ந்தவர்கள் புனித பயணம் மேற்ெகாள்ள விண்ணப்பிக்கலாம் appeared first on Dinakaran.