திருவண்ணாமலை, நவ.18: திருவண்ணாமலை அண்ணாமலையார் கோயிலில், விடுமுறை நாளான நேற்று பக்தர்கள் கூட்டம் அலைமோதியது. அதனால், நீண்ட வரிசையில் 2 மணிநேரம் காத்திருந்து தரிசனம் செய்தனர். திருவண்ணாமலை அண்ணாமலையார் கோயிலுக்கு வருகை தரும் பக்தர்களின் எண்ணிக்கை சமீபகாலமாக அதிகரித்து வருகிறது. பவுர்ணமி மற்றும் விசேஷ நாட்களில் மட்டுமே பக்தர்கள் வருகை அதிகரித்து இருந்த நிலை மாறி, வார இறுதி நாட்களிலும், தொடர் விடுமுறைகளிலும் ஏராளமான பக்தர்கள் தரிசனத்துக்காக வருகின்றனர். குறிப்பாக, வெளிமாநிலங்களில் இருந்து திருவண்ணாமலை அண்ணாமலையார் கோயிலுக்கு வருகை தரும் பக்தர்கள் எண்ணிக்கை வெகுவாக அதிகரித்துள்ளது.
இந்நிலையில், ஐப்பசி மாத பவுர்ணமி கிரிவலத்தை தொடர்ந்து வார இறுதி விடுமுறை தினம் அமைந்ததால், நேற்றும் அண்ணாமலையார் கோயிலில் தரிசனத்திற்காக கூட்டம் அலைமோதியது. அதன்படி, அதிகாலையில் இருந்தே பொது தரிசன வரிசை மற்றும் ₹50 கட்டண தரிசன வரிசையில் கூட்டம் அலைமோதியது. அதனால், நீண்ட வரிசையில் காத்திருந்து பக்தர்கள் தரிசனம் செய்தனர். தரிசன வரிசை வெளிப்பிரகாரம் வரை நீண்டிருந்தது. எனவே, தரிசன வரிசையில் சுமார் 2 மணி நேரம் காத்திருக்க வேண்டிய நிலை ஏற்பட்டது.
தரிசனத்துக்காக வரிசையில் காத்திருந்த பக்தர்களுக்கு கோயில் நிர்வாகம் சார்பில், நாள்தோறும் பிரசாதம் வழங்கும் திட்டத்தின் கீழ் லட்டு வழங்கப்பட்டது. நேற்று ஒரே நாளில் மட்டும் சுமார் 40 ஆயிரம் பக்தர்கள் தரிசனம் செய்ததாக கோயில் நிர்வாகத்தின் சார்பில் தெரிவிக்கப்பட்டது. வெளி மாவட்ட மற்றும் வெளி மாநில பக்தர்கள் வருகை அதிகரித்ததால், மாடவீதியில் கனரக வாகனங்கள் அனுமதிக்கவில்லை. ஆனாலும், பஸ்நிலையம், சின்னக்கடை தெரு, சன்னதி தெரு, மத்தலாங்குள தெரு உள்ளிட்ட சாலைகளில் கடும் போக்குவரத்து நெரிசல் ஏற்பட்டது.
மாட வீதியை இணைக்கும் அனைத்து இணைப்பு சாலைகளிலும், இரும்பு தடுப்பான்கள் அமைத்து, வாகனங்கள் தடை செய்யப்பட்டது. சுற்றுலா வாகனங்கள் அனைத்தும் நகருக்கு வெளியே, காந்தி நகர் திறந்தவெளி மைதானம் மற்றும் அண்ணா நுழைவாயில் அருகே நிறுத்த ஏற்பாடு செய்யப்பட்டது. கேப்சன் வார விடுமுறை தினமான நேற்று திருவண்ணாமலை அண்ணாமலையார் கோயிலில் சுவாமி தரிசனம் செய்ய பக்தர்கள் கூட்டம் அதிகளவில் காணப்பட்டதால் நீண்ட வரிசையில் காத்திருந்தனர்.
The post அண்ணாமலையார் கோயிலில் பக்தர்கள் கூட்டம் அலைமோதியது நீண்ட வரிசையில் 2மணிநேரம் காத்திருந்து தரிசனம் சாலைகளில் கடும் வாகன நெரிசல் விடுமுறை தினமான நேற்று appeared first on Dinakaran.
