புதுச்சேரி, நவ. 16: தங்கத்தில் முதலீடு செய்தால் லாபம் கிடைப்பதாக கூறி பெண் உள்பட 3 பேரிடம் ரூ.31.56 லட்சம் மோசடி செய்யப்பட்டது குறித்து புதுச்சேரி சைபர் கிரைம் போலீசார் விசாரணை நடத்தி வருகின்றனர்.
புதுச்சேரி கரிக்காலம்பாக்கம் பகுதியை சேர்ந்தவர் ஜெயமாலினி. இவர் இன்ஸ்டாகிராம் பக்கத்தில் வந்த விளம்பரத்தை கிளிக் செய்தபோது, வாட்ஸ் அப்பை சென்றடைந்தது. அதில் தனது பெயர், பாலினம், வயது, வேலை மற்றும் முகவரி ஆகியவற்றை பதிவு செய்யமாறு காண்பித்துள்ளது. பின்னர் ஜெயமாலினி அதை முடித்துடன், மர்ம நபர் ஒரு லிங்க்கை அனுப்பினார். அந்த லிங்க்கை ஜெயமாலினி கிளிக் செய்தவுடன், அவரது பெயரில் ஒரு கணக்கு உருவாக்கப்பட்டது. பின்னர் கணக்கை தொடங்கியவுடன் ரூ.200 ஜெயமாலினி கட்டியுள்ளார்.
பின்னர் ெஜயமாலினிக்கு கொடுக்கப்பட்ட வேலைகளை முடிக்க, முடிக்க அவரது கணக்குக்கு பணம் வந்துள்ளது. ஒவ்வொரு முறையும் கொடுக்கப்பட்ட வேலை முடிப்பதற்கு முன்பணம் கட்டி, ஜெயமாலினி வேலை முடித்து வந்துள்ளார். இந்நிலையில் ஜெயமாலினி தான் ஈட்டிய பணத்தை எடுக்க முயன்றபோது, விஐபி உறுப்பினராக இருக்க வேண்டும் என்று வந்துள்ளது. இதனைநம்பி ஜெயமாலினியும் விஜபி உறுப்பினருக்கு மொத்தமாக ரூ.6.88 லட்சத்தை கட்டினார். தொடர்ந்து முழு தொகையும் பெற ரூ.10 லட்சம் மதிப்புள்ள விஜபி உறுப்பினராக வேண்டும் என்று காட்டியுள்ளனர். அதன்பிறகே ஜெயமாலினி மோசடி கும்பலிடம் பணத்தை இழந்தது தெரியவந்தது.
இதேபோல் நைனார்மண்டபம் பகுதியை சேர்ந்த வேலாயுதம் என்பவரை மர்ம நபர் தொடர்பு கொண்டு பங்குசந்தையில் முதலீடு செய்து அதிக பணம் சம்பாதிக்கலாம் என கூறியுள்ளார். இதனை நம்பி வேலாயுதமும் ரூ.13 லட்சத்தை முதலீடு செய்து மோசடி கும்பலிடம் ஏமாந்துள்ளார். தொடர்ந்து முத்தரையர்பாளையம் பகுதியை சேர்ந்த திவ்யா ரூ.11.68 லட்சத்தை முதலீடு செய்து மோசடி கும்பலிடம் ஏமாந்துள்ளார். மேற்கூறிய நபர்கள் மொத்தமாக ரூ.31.56 லட்சத்தை மோசடி கும்பலிடம் இழந்துள்ளனர். இதுகுறித்து பாதிக்கப்பட்டவர்கள் சைபர் கிரைம் காவல் நிலையத்தில் புகார் அளித்ததன் பேரில் போலீசார் வழக்குபதிந்து விசாரணை நடத்தி வருகின்றனர்.
The post தங்கத்தில் முதலீடு செய்தால் லாபம் கிடைப்பதாக கூறி பெண் உள்பட 3 பேரிடம் ₹31.56 லட்சம் மோசடி appeared first on Dinakaran.
