அலங்கார பல்பு வெடித்து 4 பேர் காயம்

கோவை, மார்ச்.9:  கோவை ரேஸ்கோர்ஸ் நடைபயிற்சி தளத்தில் கோவை மாநகராட்சி சார்பில் ஸ்மார்ட் சிட்டி பணிகள் நடக்கிறது. நேற்று இரவு அலங்கார பல்புகள் பொருத்தும் பணி நடந்தது. 4 அடி உயரத்தில் பில்லர் தூண் அமைத்து அதில் சுமார் 10 அடி உயரமுள்ள பல்புகளை நிறுத்தி வைக்கும் பணியில் வட மாநில தொழிலாளர்கள் ஈடுபட்டிருந்தனர். அப்போது ஒரு பல்பு திடீரென சத்தத்துடன் வெடித்தது. இதில் பணியில் இருந்த 4 தொழிலாளர்கள் கண்ணாடி துகள்கள் சிதறியதில் காயமடைந்தனர். அலங்கார பல்புகளில் காஸ் நிரம்பியிருப்பதாக தெரிகிறது. பணி செய்யும்போது காஸ் அழுத்தம் காரணமாக வெடித்திருக்கலாம் என கூறப்படுகிறது. காயமடைந்த தொழிலாளர்கள் காயத்துடன் மருத்துவமனையில் சேர்க்கப்பட்டனர். இது தொடர்பாக ரேஸ்ேகார்ஸ் போலீசார் விசாரணை நடத்தி வருகின்றனர்.