புவனேஸ்வர்: வங்கி இருப்புத்தொகையை தர மறுத்ததால் சகோதரியின் எலும்பு கூட்டை வங்கிக்கு எடுத்துச்சென்ற சகோதரனுக்கு இறுதியாக வங்கி நிர்வாகம் பணத்தை வழங்கியது. ஒடிசா, கியோஞ்சர் மாவட்டத்தை சேர்ந்தவர் ஜித்து முண்டா(50).பழங்குடி வகுப்பை சேர்ந்த இவரின் சகோதரி கல்ரா முண்டா. 2 மாதங்களுக்கு முன்பு உயிரிழந்துள்ளார். இவர் இறப்பதற்கு முன்னரே, இவரது பிள்ளை மற்றும் கணவர் ஆகிய இருவரும் ஏற்கனவே உயிரிழந்து விட்டனர். இதையடுத்து, ஜித்து மட்டும்தான் அவரது வாழும் ஒரே ஒரு உறவினராக இருக்கிறார்.
கல்ரா முண்டா, கிராமவங்கியில் கணக்கு வைத்திருந்தார். அதில் இருக்கும் ரூ.20,000 பணத்தை எடுக்க ஜித்து வங்கிக்கு சென்றுள்ளார். அப்போது வங்கி அதிகாரிகள் அந்த கணக்கு வைத்திருப்பவர் வரணும் இல்லன்னா சட்டப்பூர்வ வாரிசு ஆவணங்களைச் சமர்ப்பிக்க வேண்டும் என்று கூறி பணத்தை கொடுக்க மறுத்துள்ளனர். இதில் கடும் ஏமாற்றமடைந்த அவர் இறந்து போன சகோதாரியின் எலும்புக்கூட்டை வங்கிக்கு நேரில் கொண்டு சென்றார். இந்த சம்பவம் நாடு முழுவதும் பரபரப்பை ஏற்படுத்தியது.
இது வங்கியின் மனிதாபிமானமற்ற செயல் என பலரும் கண்டனம் தெரிவித்தனர். இதையடுத்து ஒடிசா முதல்வர் மோகன் சரண் மாஜி விசாரணைக்கு உத்தரவிட்டார். மேலும், காவல் துறையினரும் உள்ளூர் அதிகாரிகளும் முண்டாவை சமாதானப்படுத்தினர், மேலும் அவரது கோரிக்கை நிறைவேற்றப்படும் என்றும் அவருக்கு உறுதியளித்தனர். இந்நிலையில் ஒடிசா கிராமின் வங்கி, தனது எக்ஸ் தளத்தில், ‘இறந்தவர் நேரில் வர வேண்டும் என்று வங்கி அதிகாரிகள் தெரிவித்ததாக கூறப்படும் தகவல் தவறானது.
சட்டப்படியான ஆவணங்கள் இல்லாததால் பணத்தை வழங்க முடியவில்லை. அந்த நபர் மதுபோதையில் இருந்ததால் நடைமுறைகளை விளக்கி கூறியும் அவர் ஏற்கவில்லை. தற்போது அரசு அதிகாரிகள் வழங்கிய வாரிசு சான்றிதழின் அடிப்படையில், 19,402 ரூபாய், 3 வாரிசுதாரர்களிடம் ஒப்படைக்கப்பட்டுள்ளது’ என தெரிவிக்கப்பட்டுள்ளது. இதுகுறித்து உள்ளூர் மக்கள் கூறுகையில், ‘கிராம பஞ்சாயத்து தலைவரிடம் விசாரித்தாலே உண்மை தெரிந்திருக்கும்.
ஆவணங்களுக்காக ஒரு ஏழை மனிதரை இவ்வளவு தூரம் அலைக்கழித்தது வேதனைக்குரியது’ என்றனர். இந்நிலையில், இந்த விவகாரத்தில், அவருக்கு உதவியாக 30,000 ரூபாயையும் வழங்க அதிகாரிகள் முன்வந்தனர். மேலும், அரசு அதிகாரிகள் இறப்பு சான்றிதழையும் சட்டப்பூர்வ வாரிசு ஆவணங்களையும் ஜித்து முண்டாவிடம் வழங்கினர்.
* ஒடிசா சட்டப்பேரவையில் அமளி
ஒடிசா சட்டமன்றத்தில் ஜனநாயகத்தில் பெண்கள் பங்கேற்பு குறித்து விவாதிப்பதற்காக சிறப்பு அமர்வு நேற்று நடந்தது. இதில் எலும்புகூடு விவகாரத்தை காங்கிரஸ், பிஜேடி எம்எல்ஏக்கள் எழுப்பி மாநில அரசை விமர்சித்தனர். எதிர்க்கட்சித் தலைவர் நவீன் பட்நாயக் பேசுகையில், ‘உணர்வற்ற ஒடிசா அரசு மக்களை முற்றிலுமாக கைவிட்டுவிட்டது. பழங்குடியின மனிதனின் துயரம் வேதனையானது.
ஒரு பெண்ணுக்குச் சேர வேண்டிய உரிமைகளைப் பெறுவதற்காக, அவரது மரணத்தை நிரூபிக்க, அவரது குடும்பத்தினரே எலும்புக்கூட்டைத் தோண்டி எடுத்து வங்கிக்குக் கொண்டு செல்ல வேண்டியிருந்ததால்,ஒடிசா வெட்கித் தலைகுனிகிறது. ஒடிசாவின் வரலாற்றில் இத்தகைய மனிதாபிமானமற்ற ஆட்சி இதற்கு முன் ஒருபோதும் இருந்ததில்லை’ என்றார். இந்த விவகாரத்தை எழுப்பிய காங்கிரஸ் எம்எம்ஏக்கள் சட்டமன்றத்தில் இருந்து வெளிநடப்பு செய்தனர்.
