கவுகாத்தி: அசாம் பா.ஜ கூட்டணியில் உள்ள போடோலாந்து மக்கள் முன்னணி கட்சியின் வேட்பாளர் வேல்லி மொஹிலாரி தனது வேட்புமனு பிரமாண பத்திரத்தில் கணக்கு காட்டியுள்ள சொத்துக்கள் அசாம் மக்களிடையே பரபரப்பை ஏற்படுத்தி உள்ளது. அவரிடம் ரூ.54.04 கோடிக்கும் அதிகமான மதிப்புள்ள சொத்துக்கள், 37 வங்கிக் கணக்குகள், 32 வாகனங்கள் தனக்குச் சொந்தமாக இருப்பதாக அறிவித்துள்ளார். 49 வயதான வேல்லி, கோக்ராஜார் தொகுதியிலிருந்து போட்டியிடுகிறார். இத்தொகுதி,இவரது கணவர் ஹக்ராமா மொஹிலாரி தலைமை வகிக்கும் போடோலாந்து பிராந்திய கவுன்சிலின் தலைமையிடமாகத் திகழ்கிறது.
ஹக்ராமா மொஹிலாரி, போடோலாந்து மக்கள் முன்னணி கட்சியின் தலைவராகவும் உள்ளார். பொருளாதாரத்தில் முதுகலைப் பட்டம் பெற்றவரான வேல்லி மொஹிலாரி (49), 25க்கும் மேற்பட்ட விவசாய மற்றும் விவசாயம் சாராத நிலங்களைச் சொந்தமாக வைத்துள்ளார். இவரது கணவர் மொத்தம் ரூ.9.15 கோடி மதிப்புள்ள சொத்துக்களைக் கொண்டுள்ளார்; இதில் 8 வங்கிக் கணக்குகளில் உள்ள வைப்புத்தொகையும், ஒரு வாகனமும் அடங்கும். 2024-25 நிதியாண்டில் தனது வருமானம் ரூ.9.33 கோடி என இவர் அறிவித்துள்ளார். அதே நிதியாண்டில் இவரது கணவரின் வருமானம் ரூ.62 கோடியாக இருந்துள்ளது.
