தைராய்டு பாதிப்பால் உடலில் ஏற்படும் மாற்றங்கள்!

நன்றி குங்குமம் டாக்டர்

தைராய்டு என்பது கழுத்தின் முன்பகுதியில் அமைந்துள்ள, பட்டாம்பூச்சி போன்று இருக்கும் ஒரு சிறிய சுரப்பி ஆகும். இது சிறியதாக இருந்தாலும், நம் உடல் சீராக இயங்குவதில் மிக முக்கியப் பங்கு வகிக்கிறது. இது நமது வளர்சிதை மாற்றம், ஆற்றல் அளவு, இதயத் துடிப்பு, உடல் வெப்பம் மற்றும் முழுமையான வளர்ச்சியைப் பராமரிக்கத் தேவையான ஹார்மோன்களை உற்பத்தி செய்கிறது.

இந்தச் சுரப்பி சரியாக வேலை செய்யவில்லை என்றால், அதன் பாதிப்பை உடல் முழுவதும் உணர முடியும் என்கிறார் நீரிழிவு நோய் சிகிச்சை நிபுணரும் உள் மருத்துவ ஆலோசகருமான மருத்துவர் ஹரிஹரன். இது குறித்து மேலும் அவர் நம்முடன் பகிர்ந்து கொண்டவை.

இந்தியாவில் தைராய்டு நோய்

இந்தியாவில் மிகவும் பொதுவாகக் காணப்படும் ஹார்மோன் சம்பந்தமான பிரச்னைகளில் தைராய்டு பிரச்னையும் ஒன்றாக உள்ளது. சுமார் 4 கோடியே 20 லட்சம் இந்தியர்கள் ஏதேனும் ஒரு வகை தைராய்டு நோயால் பாதிக்கப்பட்டுள்ளதாக ஆய்வுகள் கூறுகின்றன.தேசிய குடும்ப நல ஆய்வு தரவுகளின்படி, தாங்களாகவே தெரிவிக்கும் தைராய்டு அல்லது காய்டர் பாதிப்பு 2015-16ல் 2.2% ஆக இருந்தது, அது 2019-21ல் 2.9% ஆக அதிகரித்துள்ளது. இதில் பெண்கள் அதிகளவில் பாதிக்கப்படுகின்றனர்; ஆண்களை விட பெண்களுக்கு தைராய்டு பிரச்னைகள் வருவது இரண்டு முதல் மூன்று மடங்கு அதிகமாக உள்ளது.

எந்த வயதில் பாதிக்கிறது?

வயதும் இதில் ஒரு முக்கிய பங்கு வகிக்கிறது. தேசிய குடும்ப நல ஆய்வு-4 தரவுகளின்படி, பெண்களுக்கு வயது அதிகரிக்கும் போது தைராய்டு கோளாறுகளும் அதிகரிக்கின்றன. 15 முதல் 19 வயதுக்குட்பட்ட பெண்களிடம் 0.7 சதவீதமாக இருக்கும் பாதிப்பு, 35 முதல் 49 வயதுடையவர்களிடம் 3.4 சதவீதமாக உயர்கிறது. வயதாக வயதாக, குறிப்பாகப் பெண்களுக்கு, தைராய்டு பிரச்னைகள் வருவது அதிகம் ஏற்படுவதாக இந்த ஆய்வு கூறுகிறது.

வயதுக்கு ஏற்ப மாறுபாடு

மக்கள் வயதாகும் போது, தைராய்டு சுரப்பி மெதுவாக வேலை செய்யலாம் அல்லது அளவுக்கு அதிகமாக வேலை செய்யலாம். வயது தொடர்பான பொதுவான தைராய்டு நிலைகள் பின்வருமாறு:

ஹைப்போதைராய்டிசம்: வயதானவர்களிடம் இது மிகவும் பொதுவாகக் காணப்படுகிறது. இதில் சுரப்பி குறைவான ஹார்மோன்களைச் சுரக்கும், இதனால் உடல் செயல்பாடுகள் மந்தமாகும்.

ஹைப்பர்தைராய்டிசம்: இது வயதானவர்களிடம் குறைவாகவே காணப்பட்டாலும், ஆபத்தானது. இது இதயம், எலும்புகள் மற்றும் வளர்சிதை மாற்றத்தைப் பாதிக்கலாம்.

தைராய்டு முடிச்சுகள்: இவை தைராய்டு சுரப்பியில் தோன்றும் சிறிய கட்டிகள் ஆகும். 50 வயதுக்கு மேற்பட்டவர்களிடம் இது அதிகம் காணப்படும். பெரும்பாலும் இவை ஆபத்தற்றவை, ஆனால் மருத்துவ பரிசோதனை செய்வது கட்டாயமாகும்.

காய்டர்: இது தைராய்டு சுரப்பியின் வீக்கம் ஆகும். அயோடின் கலந்த உப்பைப் பயன்படுத்துவதால் அயோடின் குறைபாடு குறைந்திருந்தாலும், சில பகுதிகளில் காய்டர் இன்னும் காணப்படுகிறது.

அறிகுறிகள்

தைராய்டு அறிகுறிகள் பெரும்பாலும் சாதாரண சோர்வு அல்லது வயது முதிர்வு தொடர்பான பிரச்சனைகளைப் போலவே இருப்பதால், பலர் இதைக் கவனிக்கத் தவறுகிறார்கள். இவற்றை முன்கூட்டியே கண்டறிவது மூலம் பாதிப்பை வெகுவாக குறைக்க முடியும்.

ஹைப்போ தைராய்டிசம் அறிகுறிகள்

*உடல் சோர்வு
*உடல் எடை அதிகரிப்பு
*வழக்கத்திற்கு மாறாகக் குளிர் எடுப்பது
*வறண்ட சருமம் மற்றும் முடி உதிர்தல்
*மலச்சிக்கல்
*மனச்சோர்வு அல்லது மன அழுத்தம்
*சீரற்ற மாதவிடாய் சுழற்சி.

ஹைப்பர் தைராய்டிசம் அறிகுறிகள்

*காரணமில்லாமல் எடை குறைதல்
*வேகமான இதயத் துடிப்பு
*பதற்றம் அல்லது எரிச்சல்
*கைகளில் நடுக்கம்
*அதிகப்படியான வியர்வை
*அடிக்கடி மலம் கழித்தல்
*தூங்குவதில் சிரமம்.

தைராய்டு கட்டிகள் (காய்டர்) அறிகுறிகள்

*கழுத்தில் வீக்கம்

*விழுங்குவதில் சிரமம்

*குரலில் மாற்றம் (கரகரப்பு)

இந்த அறிகுறிகள் யாருக்கேனும் சில வாரங்களுக்கு மேல் தொடர்ந்தால், அவர்கள் கண்டிப்பாகப் பரிசோதனை செய்துகொள்ள வேண்டும்.

பரிசோதனைகள்

எளிமையான மற்றும் பரவலாகக் கிடைக்கும் பரிசோதனைகள் மூலம் தைராய்டு நோய்களைக் கண்டறியலாம்:

தைராய்டு தூண்டும் ஹார்மோன்: இது மிக முக்கியமான ஸ்கிரீனிங் பரிசோதனை ஆகும். TSH அளவு அதிகமாக இருந்தால் அது ஹைப்போதைராய்டிசத்தையும் (குறைந்த சுரப்பு), TSH அளவு குறைவாக இருந்தால் அது ஹைப்பர்தைராய்டிசத்தையும் (அதிக சுரப்பு) குறிக்கிறது.

ப்ரீ டி3 மற்றும் ப்ரீ டி4 பரிசோதனை: ரத்தத்தில் உள்ள உண்மையான தைராய்டு ஹார்மோன் அளவுகளை கண்டறிய இந்தப் பரிசோதனைகள் உதவுகின்றன.

ஆன்டி-டிபிஓ ஆன்டிபாடி பரிசோதனை: ஹாஷிமோட்டோஸ் தைராய்டிடிஸ் போன்ற தற்சார்பு நோய் எதிர்ப்பு தைராய்டு நோய்களைக் கண்டறிய இது உதவுகிறது.

கழுத்து அல்ட்ராசவுண்ட் ஸ்கேன்: தைராய்டு முடிச்சுகள், நீர்க்கட்டிகள் அல்லது சுரப்பியின் வீக்கத்தைக் கண்டறிய இது செய்யப்படுகிறது.ஊசி மூலம் நீர் எடுத்து பரிசோதித்தல்: சந்தேகத்திற்குரிய தைராய்டு முடிச்சுகளை மதிப்பிட, ஊசி மூலம் செய்யப்படும் மிகச் சிறிய மற்றும் எளிய பரிசோதனையாகும்.

சிகிச்சை முறைகள்

இதற்கு மிகச் சிறந்த சிகிச்சைகள் உள்ளன. முறையான கவனிப்புடன், பெரும்பாலானோர் முழுமையான இயல்பு வாழ்க்கையை வாழ முடியும்.

ஹைப்போதைராய்டிசம் (குறைந்த சுரப்பு): இதற்கு தினமும் தைராய்டு ஹார்மோன் மாத்திரை எடுத்துக்கொள்ள வேண்டும்.

ஹைப்பர்தைராய்டிசம் (அதிக சுரப்பு): ஹார்மோன் உற்பத்தியைக் குறைக்கும் மருந்துகள், கதிரியக்க அயோடின் சிகிச்சை அல்லது சிலருக்கு அறுவைசிகிச்சை மூலம் இது கட்டுப்படுத்தப்படுகிறது.

தைராய்டு முடிச்சுகள்: ஆபத்தற்ற முடிச்சுகளுக்கு எந்தவித சிகிச்சையும் தேவையில்லை. சந்தேகத்திற்குரிய முடிச்சுகளாக இருந்தால், அறுவைசிகிச்சை மூலம் அகற்ற வேண்டும்.

காய்டர்: அயோடின் குறைபாடு, ஆட்டோ இம்யூன் நோய் அல்லது முடிச்சுகள் என அதன் அடிப்படை காரணத்தைப் பொறுத்து இதற்கான சிகிச்சை மாறுபடும்.

தைராய்டிலிருந்து தற்காத்துக் கொள்வது எப்படி?

தொடர்ந்து அயோடின் கலந்த உப்பைப் பயன்படுத்துங்கள்.35 வயதுக்கு மேல், குறிப்பாகப் பெண்கள், தைராய்டு பரிசோதனை செய்து கொள்வது நல்லது.அயோடின், செலினியம் மற்றும் துத்தநாகம் நிறைந்த சத்தான உணவை உட்கொள்ளுங்கள்.மன அழுத்தம் இல்லாமல் பார்த்துக் கொள்ள வேண்டும் மற்றும் போதுமான அளவு தூக்கம் அவசியமாகும்.மருத்துவர் ஆலோசனையின்றி தைராய்டு மருந்துகளைத் தாங்களாகவே எடுத்துக்கொள்வதைத் தவிர்க்கவும்.

முடிவுரை: தைராய்டு நோய்கள் பொதுவானவை, ஆனால் ஆரம்பத்திலேயேகண்டறிந்து சரியான நேரத்தில் சிகிச்சை அளிப்பதன் மூலம் நீண்ட அதிக அளவிலான பாதிப்பு ஏற்படாமல் தடுக்க முடியும். இந்தச் சிறிய சுரப்பி நம் முழு உடல் ஆரோக்கியத்திலும் பெரிய தாக்கத்தை ஏற்படுத்துகிறது என்பதை நினைவூட்டவே‘தைராய்டு வாரம்’ எல்லாம் கடைபிடிக்கப்படுகிறது.

தொகுப்பு: ஸ்ரீ தேவி