சென்னை: தங்கம் விலை வார தொடக்க நாளான நேற்று காலை, மாலை என அதிரடியாக பவுனுக்கு ரூ.1280 உயர்ந்தது. இதே போல, வெள்ளியும் கிலோவுக்கு ரூ.9 ஆயிரம் அதிகரித்து கடும் அதிர்ச்சியை ஏற்படுத்தியது.
தங்கம், வெள்ளி விலை கடந்தாண்டு இறுதியில் அதிரடியாக உயர்ந்து வந்தது. 2ம் தேதி பவுனுக்கு ரூ.1,120 உயர்ந்து ஒரு பவுன் ரூ.1 லட்சத்து 640க்கு விற்பனையானது. 3ம் தேதி விலையில் திடீர் மாற்றம் காணப்பட்டது. அதாவது, அன்றைய தினம் காலையில் தங்கம் விலை பவுனுக்கு ரூ.480 குறைந்து ஒரு பவுன் ரூ.1,00,160க்கு விற்றது. இந்த விலை குறைவு என்பது சில மணி நேரம் தான் நீடித்தது. தொடர்ந்து மாலையில் மீண்டும் தங்கம் விலை அதிரடியாக உயர்ந்தது. பவுனுக்கு ரூ.640 உயர்ந்து ஒரு பவுன் ரூ.1 லட்சத்து 800க்கு விற்பனையானது.
ஒரு நாள் விடுமுறைக்கு பிறகு நேற்று தங்கம் மார்க்கெட் தொடங்கியது. வாரத்தின் தொடக்க நாளான நேற்று காலையில் தங்கம் விலை அதிரடியாக உயர்ந்தது. அதாவது தங்கம் விலை கிராமுக்கு ரூ.80 உயர்ந்து ஒரு கிராம் ரூ.12,680க்கும், பவுனுக்கு ரூ.640 உயர்ந்து ஒரு பவுன் ரூ.1,01,440க்கு விற்றது. தங்கத்தை போல வெள்ளி விலையும் நேற்று காலை அதிகரித்து காணப்பட்டது. வெள்ளி விலை கிராமுக்கு ரூ.8 உயர்ந்து ஒரு கிராம் ரூ.265க்கும், கிலோவுக்கு ரூ.8 ஆயிரம் உயர்ந்து பார் வெள்ளி 2 லட்சத்து 65 ஆயிரம் ரூபாய்க்கும் விற்றது. இந்த அதிரடி விலை உயர்வை தாங்குவதற்குள் பிற்பகலில் தங்கம், வெள்ளி விலை மேலும் உயர்ந்து அதிர்ச்சியை ஏற்படுத்தியது.
நேற்று பிற்பகலில் தங்கம் விலை கிராமுக்கு ரூ.80 அதிகரித்து ஒரு கிராம் ரூ.12,760க்கும், பவுனுக்கு ரூ.640 உயர்ந்து ஒரு பவுன் ரூ.1 லட்சத்து 2,080க்கு உயர்ந்தது. தொடர்ந்து தங்கம் விலை காலை, மாலை என பவுனுக்கு ரூ.1,280 உயர்ந்தது. வெள்ளியும் நேற்று மாலை கிராமுக்கு ரூ.1 அதிகரித்து ஒரு கிராம் ரூ.266க்கு விற்கப்பட்டது. கிலோவுக்கு ஆயிரம் உயர்ந்து, பார் வெள்ளி விலை ரூ.2.66 லட்சத்துக்கு விற்பனையானது. அதே நேரத்தில் வெள்ளி விலை காலை, மாலை என ஒரே நாளில் கிலோவுக்கு ரூ.9 ஆயிரம் உயர்ந்துள்ளது குறிப்பிடத்தக்கது.
