வால்பாறை : வால்பாறையில் நிலவி வரும் குளிரான காலநிலையால் நகரம் மற்றும் தேயிலை தோட்டப்பகுதிகளில் கம்பளி, ஸ்வெட்டர், குளிர் ஆடைகள் விற்பனை அதிகரித்துள்ளது. குறிப்பாக அதிகாலை மற்றும் இரவு நேரங்களில் வெப்பநிலை குறைந்து வருவதால் பொதுமக்கள் குளிரில் இருந்து பாதுகாத்து கொள்ள கம்பளிகளை அதிகளவில் வாங்கி வருகின்றனர்.

வால்பாறையில் ஆண்டு முழுவதும் மிதமான காலநிலை நிலவினாலும், தென்மேற்கு பருவமழைக்கு பிந்தைய காலகட்டங்களில் குளிரின் தாக்கம் அதிகமாக காணப்படும். தற்போது அதிகாலை நேரங்களில் பனிமூட்டத்துடன் கூடிய குளிர் நீடித்து வருவதால், பள்ளி மாணவர்கள், முதியவர்கள், சிறு குழந்தைகள் மற்றும் தேயிலைத் தோட்டத் தொழிலாளர்கள் கம்பளி, குளிர் தொப்பி, கையுறை, கம்பளி போர்வை உள்ளிட்ட பொருட்களை பயன்படுத்தி வருகின்றனர்.

இதன் காரணமாக வால்பாறை நகரில் உள்ள ஜவுளிக் கடைகள், நடைபாதை விற்பனையாளர்கள் மற்றும் எஸ்டேட் பகுதிகளுக்கு சென்று விற்பனை செய்யும் வியாபாரிகளிடம் கம்பளி விற்பனை கடந்த வாரத்தை விட கணிசமாக உயர்ந்துள்ளதாக வியாபாரிகள் தெரிவித்தனர். குறிப்பாக ஒற்றை மற்றும் இரட்டை கம்பளி போர்வைகள், குழந்தைகளுக்கான கம்பளிகள், கம்பளி ஜாக்கெட்டுகள், ஸ்வெட்டர்கள் ஆகியவற்றுக்கு அதிக தேவை ஏற்பட்டுள்ளது.

விற்பனைக்கு வந்துள்ள கம்பளி போர்வைகள் தரம் மற்றும் அளவைப் பொறுத்து ரூ.300 முதல் ரூ.1,500 வரை விற்பனை செய்யப்படுகின்றன. அதேபோல, ஸ்வெட்டர்கள் ரூ.400 முதல் ரூ.1,200 வரையும், குளிர் தொப்பிகள் ரூ.100 முதல் ரூ.300 வரையும் விற்பனை செய்யப்படுகின்றன. குறைந்த விலை முதல் உயர்தர கம்பளிகள் வரை கிடைப்பதால் பொதுமக்கள் தங்களது தேவைக்கேற்ப வாங்கிச் செல்கின்றனர்.

குறிப்பாக தேயிலை தோட்டத்தொழிலாளர்கள் அதிகாலை பணிக்கு செல்லும் போது குளிரின் தாக்கம் அதிகமாக இருப்பதால் கம்பளி ஆடைகள் மற்றும் போர்வைகளை வாங்குவதில் ஆர்வம் காட்டுகின்றனர். சுற்றுலாப் பயணிகளும் இரவு நேர குளிரை சமாளிக்க உள்ளூர் கடைகளில் இருந்து குளிர் ஆடைகளை வாங்கிச் செல்கின்றனர்.

குளிர் தொடரும் நிலையில் வரும் நாட்களிலும் கம்பளி மற்றும் குளிர் ஆடைகளின் விற்பனை மேலும் அதிகரிக்கும் என வியாபாரிகள் நம்பிக்கை தெரிவித்துள்ளனர். அதேநேரம், முதியவர்கள், குழந்தைகள் மற்றும் உடல் நலப்பிரச்னை உள்ளவர்கள் அதிகாலை மற்றும் இரவு நேரங்களில் போதிய குளிர் பாதுகாப்பு ஆடைகளை அணிவது குறிப்பிடத்தக்கது.