பெரம்பூர்: கொளத்தூர் சட்டமன்ற தொகுதியில் வெற்றிப்பெற்ற தமிழக வெற்றிக்கழக எம்எல்ஏ வாகனத்தில் விஜய் உருவ பொம்மையுடன் வந்து பொதுமக்களுக்கு நன்றி தெரிவித்து வருகின்றார். சென்னை கொளத்தூர் சட்டமன்ற தொகுதியில் தமிழக வெற்றிக்கழக வேட்பாளர் வி.எஸ்.பாபு வெற்றி பெற்றார். இதையடுத்து அவர் வாக்காளர்களுக்கு நன்றி தெரிவித்து வருகின்றார். இதற்காக கொளத்தூர் வி.எஸ்.பாபு எம்எல்ஏ தனது வாகனத்தில் விஜய் உருவ பொம்மையை வைத்துக்கொண்டு நேற்றுமுன்தினம் இரவு வீதி, வீதியாக சென்று பொதுமக்களுக்கு நன்றி தெரிவித்து வருகின்றார்.

இதை பார்த்த பொதுமக்கள், ‘’ தேர்தல் பிரசாரத்துக்கும் விஜய் வரவில்லை. தற்போது வெற்றிப்பெற்ற அவரது கட்சி எம்எல்ஏவும் பொம்மை விஜய்யை வைத்துக்கொண்டு வாக்காளர்களுக்கு நன்றி தெரிவிக்கிறார். இவர்கள் மக்களை என்னவென்று நினைக்கிறார்கள் என்று தெரியவில்லை’’ என்று முணுமுணுத்தப்படி சென்றனர். இதனிடையே இந்த வீடியோ சமூகவலைதள பக்கத்தில் பெரும் வைரலாகி வருகிறது. ‘’ஓட்டு கேட்கும் போதும் டம்மி விஜய் வந்தார். அவரது கட்சி வேட்பாளர் வெற்றி பெற்ற பின்பும் டம்மி விஜய்யுடன் நன்றி தெரிவிக்கிறார். ஒரிஜினல் விஜய் எப்போது வருவார்’’ என்று நெட்டிசன்கள் வறுத்தெடுத்து வருகின்றனர்.