டெல்லி: 24-வது நாளாக உண்ணாவிரதம் இருக்கும் சமூக ஆர்வலர் சோனம் வாங்சுக், தனது உடல்நலனைக் கருத்தில் கொண்டு உடனடியாகப் போராட்டத்தைக் கைவிட வேண்டும் என நடிகை ப்ரீத்தி ஜிந்தா கோரிக்கை விடுத்துள்ளார்.

மேலும் இதுகுறித்து எக்ஸ் தளத்தில் அவர் வெளியிட்டுள்ள பதிவில்: “சோனம் வாங்சுக்கின் உடல்நிலை மேலும் மோசமடைவதற்குள், மத்திய அரசு அவரோடும் மாணவர் அமைப்புகளோடும் அர்த்தமுள்ள பேச்சுவார்த்தையைத் தொடங்க வேண்டும் என்று நம்புகிறேன்!

சோனம், தயவுசெய்து உங்கள் உண்ணாவிரதத்தை முடிவுக்குக் கொண்டு வாருங்கள். நீங்கள் போராடும் இந்த லட்சியத்தைப் போலவே உங்கள் ஆரோக்கியமும் மிக முக்கியமானது. நீங்களும் மாணவர்களும் இந்தியாவின் எதிர்காலத்திற்காகவும், இளைஞர்களின் நலனுக்காகவுமே போராடுகிறீர்கள். கல்வி முறையை மேம்படுத்துவதற்காக போராடும் ஒவ்வொரு மாணவருக்கும், சோனம் வாங்சுக்கிற்கும் எனது மனமார்ந்த ஆதரவு உண்டு. உங்கள் அனைவருக்கும் கூடுதல் சக்தி கிடைக்கட்டும்” என பதிவிட்டுள்ளார்.

இப்போராட்டத்திற்குத் திரையுலகைச் சேர்ந்த பல பிரபலங்கள் தொடர்ந்து ஆதரவு தெரிவித்து வருகின்றனர். பிரகாஷ் ராஜ், ஷபானா ஆஸ்மி ஆகியோர் நேரடியாகப் போராட்ட களத்திற்குச் சென்று கலந்துகொண்ட நிலையில், தில்ஜித் தோசாஞ்ச், சோனு சூத் உள்ளிட்ட பலர் சமூக வலைதளங்கள் மூலம் தங்களது ஆதரவைப் பதிவு செய்து காவல்துறையின் நடவடிக்கையைக் கண்டித்துள்ளனர்.

இதனிடையே, போராட்ட களத்தில் இருந்து அப்புறப்படுத்தப்பட்டு அரசு மருத்துவமனையில் அனுமதிக்கப்பட்டிருந்த சோனம் வாங்சுக்கை, அவரது மனைவியின் மனுவை ஏற்று மேதாந்தா (Medanta) தனியார் மருத்துவமனைக்கு மாற்ற டெல்லி உயர்நீதிமன்றம் உத்தரவிட்டுள்ளது. பேரணியின் போது ஏற்பட்ட மோதலில் பலர் காயமடைந்ததைத் தொடர்ந்து டெல்லியில் பாதுகாப்பு பலப்படுத்தப்பட்டுள்ளது.