திருச்சி, நவ.5: தொழிலாளர் விரோத போக்கை கண்டித்து திருச்சியில் மின்வாரிய ஊழியர்கள் நேற்று தர்ணா போராட்டத்தில் ஈடுபட்டனர். மின் வட்டங்களில் பணியாற்றும் பொறியாளர், அலுவலர்களின் பதவிகளை ஒழிக்கக்கூடாது. துணை மின் நிலையங்களில் ஓய்வு பெற்றவர்களை நியமித்து பராமரிப்பை தனியாரிடம் விடக்கூடாது. அரசாணை எண் 304ஐ மின்வாரியத்தில் அமலாக்க வேண்டும். ஊதிய உயர்வு பேச்சு வார்த்தையை உடனே துவங்க வேண்டும். 42 ஆயிரம் காலி பணியிடங்களை நிரப்ப வேண்டும். சரண்டர் லீவுத் தொகையை வழங்க வேண்டும். பொறியாளர், தொழிலாளர், பகுதி நேர ஊழியர், ஒப்பந்த ஊழியர் அனைவருக்கும் 20 சதவீத போனஸ் வழங்க வேண்டும் என்பது உள்ளிட்ட கோரிக்கைகளை வலியுறுத்தி தமிழ்நாடு மின்வாரிய தொழிற்சங்கங்களின் கூட்டு நடவடிக்கை குழு சார்பில் நேற்று தர்ணா போராட்டம் நடைபெற்றது.

திருச்சி மன்னார்புரத்தில் உள்ள மேற்பார்வை பொறியாளர் அலுவலகம் முன் தொமுச மாநில துணைத் தலைவர் மலையாண்டி தலைமையில் தர்ணா போராட்டம் நடந்தது. சிஐடியூ மாவட்ட செயலாளர் ரெங்கராஜன் துவக்க உரையாற்றினார். இதில் பொறியாளர் கழக மண்டல செயலாளர் விக்ரமன், சந்தானகிருஷ்ணன், இன்ஜினியர் சங்க சங்கர் கணேஷ், சிஐடியூ செல்வராஜ், தொமுச தியாகராஜன், ஐஎன்டியூசி கருணாநிதி, தொழிலாளர் சம்மேளனம் பெருமாள் உள்பட 300க்கும் மேற்பட்ட ஊழியர்கள் கலந்துகொண்டனர்.