×

தேர்தல் அல்லாத கால கட்டங்களில் அரசியல் கட்சிகள் நடத்தும் சாதி ரீதியான பேரணிகள், கூட்டங்களை தடை செய்ய எங்களுக்கு அதிகாரம் இல்லை: அலகாபாத் உயர்நீதிமன்றத்தில் இந்திய தேர்தல் ஆணையம்

தேர்தல் அல்லாத காலங்களில் அரசியல் கட்சிகள் நடத்தும் ஜாதி அடிப்படையிலான பேரணிகளை தடை செய்யவோ அல்லது அடுத்த தேர்தலில் போட்டியிட தடை விதிக்கவோ தனக்கு அதிகாரம் இல்லை என அலகாபாத் உயர்நீதிமன்றத்தில் இந்திய தேர்தல் ஆணையம் கூறியுள்ளது. அரசியல் கட்சிகள் நடத்தும் ஜாதிப்  பேரணிகள் அனைத்தையும் தடை செய்யக் கோரி 2013-ம் ஆண்டு அலகாபாத் உயர் நீதிமன்றத்தில் மோதி லால் யாதவ் என்பவர் பொதுநல வழக்கை தாக்கல் செய்தார்.

இதுபோன்ற பேரணிகளை நடத்தும் அரசியல் கட்சிகளின் பதிவை ரத்து செய்யுமாறு தேர்தல் ஆணையத்துக்கு உத்தரவிட வேண்டும் என்றும் அந்த மனுவில் கோரப்பட்டுள்ளது. இந்த மனுவை 2013-ம் ஆண்டு விசாரித்த உயர்நீதிமன்றம், தேர்தல் ஆணையம் மற்றும் பிற அரசியல் கட்சிகளுக்கு நோட்டீஸ் அனுப்பியது. உத்தரபிரதேசம் முழுவதும் இதுபோன்ற சாதி அடிப்படையிலான பேரணிகள் அனைத்தையும் தடை செய்ய இடைக்கால உத்தரவுகளை பிறப்பித்தது, இருப்பினும், நவம்பர் 2022 வரை நீதிமன்றத்தில் பதில் எதுவும் தாக்கல் செய்யப்படாததால், பிரதிவாதிகளுக்கு புதிய நோட்டீஸ் அனுப்பப்பட்டது. நீதிமன்றத்தின் கடந்த ஆண்டு உத்தரவின்படி, இந்திய தேர்தல் ஆணையம் அறிக்கை தாக்கல் செய்தது.

இந்த அறிக்கையில்; தேர்தல் அல்லாத காலங்களில் அரசியல் கட்சிகள் ஜாதி அடிப்படையில் கூட்டங்கள் மற்றும் பேரணிகளை நடத்துவதை கட்டுப்படுத்தவும், அடுத்த தேர்தலில் போட்டியிட தடை விதிக்கவும் தமக்கு அதிகாரம் இல்லை என கூறப்பட்டுள்ளது. மேலும் வகுப்புவாத அடிப்படையில் தேர்தல் பிரச்சாரம் செய்வதையோ, சாதி, மதம் அல்லது மதத்தின் அடிப்படையில் வாக்குகளைப் பெறுவதையோ தடுக்க கடுமையான விதிகள் உள்ளது. இருப்பினும், அந்த சட்டத்தை மீறுவது தேர்தல் காலத்திற்கு வெளியே தேர்தல் ஆணையத்தால் கையாளப்படக்கூடாது. தேர்தல் காலத்தில் மட்டுமே தேர்தல் பிரச்சாரத்தில் ஜாதி அடிப்படையில் பிரச்சாரம் செய்யும் அரசியல் கட்சிகள், போட்டியிடும் வேட்பாளர்கள் மற்றும் முகவர்கள் மீது நடவடிக்கை எடுக்க முடியும் என்றும் தேர்தல் ஆணையம் நீதிமன்றத்தில் தெரிவித்துள்ளது.


Tags : Election Commission of India ,Allahabad High Court , Election, Political party, Caste-based rallies, Allahabad High Court, Election Commission of India
× RELATED குடியரசு தலைவர் திரௌபதி முர்முவை...