போதை, பாலியல் வன்கொடுமை குறித்து விழிப்புணர்வு ஏற்படுத்த வேண்டும்-மாவட்ட எஸ்பி பரமேஸ்வர ரெட்டி பேச்சு

திருப்பதி :  சர்வதேச மகளிர் தினத்தையொட்டி, திருப்பதி எம்ஆர் பள்ளியில் உள்ள போலீஸ் அணிவகுப்பு மைதானத்தில் காவலர் குடும்ப உறுப்பினர்கள் மற்றும் மகளிர் காவலர்களுக்கு பல்வேறு வகையான புற்றுநோய்கள் குறித்த விழிப்புணர்வுடன் இலவச பல் பரிசோதனையும் நடத்தப்பட்டது. இந்த நிகழ்ச்சிக்கு தலைமை விருந்தினராக மாவட்ட எஸ்பி பரமேஸ்வர ரெட்டி கலந்து கொண்டு மருத்துவ முகாமை தொடங்கி வைத்து மருத்துவ பரிசோதனை செய்து கொண்டார்.இந்நிகழ்ச்சியில், மாவட்ட எஸ்பி பரமேஸ்வர ரெட்டி பேசியதாவது:

மார்ச் 8 சர்வதேச மகளிர் தினத்தை முன்னிட்டு, பெண்களுக்கு பல்வேறு சட்டங்கள் குறித்து விழிப்புணர்வு ஏற்படுத்தும் வகையில், குறிப்பாக ஒரு வாரத்துக்கு நிகழ்ச்சிகள் நடத்தப்பட்டு வருகின்றன. பெண்கள் ஆரோக்கியமாக இருந்தால்தான் சமுதாயம் சிறப்பாக இருக்கும். காவல் துறையினர் ஆரோக்கியமாக இருந்தால்தான் தங்கள் பணிகளைச் சரியாகச் செய்ய முடியும். சட்டங்கள் பற்றிய அறிவும், அந்த அம்சங்களில் தேர்ச்சியும் பெற்றால், பணி நிர்வாகம் திறமையாக இருக்கும்.

இன்று முதல் திருப்பதி மாவட்டத்தில் ஒருவாரம் சர்வதேச மகளிர் தினத்தை கொண்டாடி வருகிறோம். அதன் ஒரு பகுதியாக போதை, பாலியல் வன்கொடுமை, ஏவல் குறித்து பெண்களுக்கு விழிப்புணர்வு ஏற்படுத்துவதே முக்கிய நோக்கமாகும். மகளிர் தின வாரத்தைக் கொண்டாடும் வகையில், காவல் துறையில் சில நிகழ்ச்சிகளுக்கு ஏற்பாடு செய்துள்ளோம்.

அதன் ஒரு பகுதியாக இன்று, டாடா டிரஸ்ட் மற்றும் டாடா ஸ்விக்கர் சார்பில் அனைத்து வகையான புற்றுநோய் பரிசோதனை பரிசோதனைகளும், கிருஷ்ண தேஜா பல் மருத்துவமனையின்கீழ் பல் சுத்தம் செய்யும் பரிசோதனைகளும் காவல்துறை அணிவகுப்பு மைதானத்தில் காவல்துறையினருக்கு இலவசமாக நடத்தப்படுகிறது. பணியாளர்கள் மற்றும் அவர்களது குடும்ப உறுப்பினர்கள் கலந்து கொண்டு பயன்பெற வேண்டும். பொதுவாக பல பெண்கள் தங்கள் உடல்நிலை பற்றி சிந்திக்காமல், கணவன், பிள்ளைகள்தான் உலகம் என்று நினைத்து குடும்பத்தில் உள்ளவர்களிடம் உடல்நிலையை மறைத்து விடுவார்கள்.

இதுபோன்ற சந்தர்ப்பங்களில், குடும்பத்தை உணர்ச்சி ரீதியாகவும் பொருளாதார ரீதியாகவும் பாதிக்கும் உடல்நலப் பிரச்சினைகள் சாத்தியமாகும். இதை தடுக்கும் வகையில், மாவட்டம் முழுவதும் சர்வதேச மகளிர் தின விழாவை நடத்தி, அனைத்து விதமான மருத்துவ பரிசோதனைகள் செய்து, தேவையான மருத்துவ சிகிச்சைகளை, நமது காவல் துறையினர் மற்றும் குடும்பத்தினர் நலம் பேணுவதே இந்த மருத்துவ முகாம்களின் முக்கிய நோக்கமாகும். இந்த வாய்ப்பை காவல் துறையினர் மற்றும் அவர்களது குடும்பத்தினர் பயன்படுத்திக் கொள்வது மிகுந்த மகிழ்ச்சி அளிக்கிறது.இவ்வாறு அவர் கூறினார்.