2023 ஜனவரி மாதத்தில் சென்னை மெட்ரோ ரயில்களில் 66 லட்சம் பயணிகள் பயணம்: நிர்வாகம் தகவல்

சென்னை: ஜனவரி  மாதத்தில் 66.07 லட்சம் பயணிகள் சென்னை மெட்ரோ ரயில்களில் பயணித்துள்ளதாக  சென்னை மெட்ரோ ரயில் நிர்வாகம் தெரிவித்துள்ளது. இதுகுறித்து, மெட்ரோ ரயில் நிர்வாகம் வெளியிட்டுள்ள அறிக்கை: சென்னை  மெட்ரோ ரயில் நிறுவனம், சென்னையில் உள்ள மக்களுக்கும், மெட்ரோ ரயில்  பயணிகளுக்கும் போக்குவரத்து வசதியை அளித்து வருவதோடு நம்பகத்தன்மையான  பாதுகாப்பான வசதியை ஏற்படுத்துகிறது. அந்த வகையில், 2022 டிசம்பர்  மாதத்தை விட நடப்பு 2023 ஜனவரி மாதத்தில் 1 லட்சத்து 48 ஆயிரத்து 121  பயணிகள் மெட்ரோ ரயிலில் அதிகமாக பயணித்துள்ளனர்.

கடந்த ஆண்டில் 1.1.2022  முதல் 31.12.2022 வரை மொத்தம் 6,09,87,765 பயணிகள் மெட்ரோ ரயில்களில்  பயணம் செய்துள்ளனர். 1.1.2023 முதல் 31.1.2023 வரை மொத்தம் 66,07,458  பயணிகள் மெட்ரோ ரயில்களில் பயணம் செய்துள்ளனர். அதிகபட்சமாக  13.1.2023 அன்று 2,65,847 பயணிகள் மெட்ரோ ரயில்களில் பயணம் செய்துள்ளனர். 2023, ஜனவரி மாதத்தில் மட்டும் க்யூஆர் குறியீடு பயணச்சீட்டு முறையைப்  பயன்படுத்தி 21,96,536 பயணிகள் மெட்ரோ ரயில்களில் பயணம் செய்துள்ளனர். பயண  அட்டைகளை பயன்படுத்தி 39,54,733 பயணிகள் பயணித்துள்ளார்கள்.

சென்னை மெட்ரோ  ரயில் நிறுவனம் மெட்ரோ ரயில்களில் பயணிப்பவர்களுக்கு க்யூஆர் குறியீடு  பயணச்சீட்டு மற்றும் பயண அட்டைகளை பயன்படுத்தி பயணிக்கும் பயணிகளுக்கு 20%  கட்டண தள்ளுபடி வழங்கப்படுகிறது. மெட்ரோ ரயில்கள் மற்றும் மெட்ரோ ரயில்  நிலையங்களை பராமரிப்பதில் மிகுந்த ஒத்துழைப்பு நல்கிவரும் அனைத்து  பயணிகளுக்கும் சென்னை மெட்ரோ ரயில் நிர்வாகத்தின் சார்பில் மனமார்ந்த  நன்றி. இவ்வாறு அறிக்கையில் கூறப்பட்டுள்ளது.