மும்பை: இந்திய டி20 அணியில் மாற்றங்களைச் செய்வதற்கும், புதிய அணுகுமுறையைப் பெறுவதற்கும் இதுவே சரியான தருணம் என்று பிசிசிஐ தேர்வாளர்கள் ஒருமித்த கருத்தை உருவாக்கியுள்ளனர். இதன் மூலம் இலங்கைக்கு எதிரான 3 டி20 மற்றும் ஒரு நாள் தொடருக்கு முன்னதாக ஹர்திக் பாண்டியா இந்தியாவின் டி20 கேப்டனாக அதிகாரப்பூர்வமாக நியமிக்கப்படுவார் என்று அவர்கள் தெரிவித்துள்ளனர். அதேநேரத்தில் ஒருநாள் மற்றும் டெஸ்ட் அணிக்கு ரோஹித் சர்மாவே நீடிப்பார் என்றும் தெரியவந்துள்ளது.
2023 உலகக் கோப்பை வரை ஒரு நாள் அணியின் கேப்டனாகவும் டெஸ்ட் போட்டிகளை பொறுத்தவரையில் உலகக் கோப்பை சுழற்சி வரையில் ரோஹித்சர்மாவே இந்திய கேப்டனாக நீடிப்பார் ஆனால் டி20 போட்டிகளுக்கு கேப்டனை மாற்ற வேண்டிய நேரம் வந்துவிட்டது என்று ஒருமித்த கருத்து ஏற்பட்டுள்ளது. மேலும் “2024 டி20 உலகக் கோப்பைக்கு, இப்போதே தயாராக வேண்டும். அதற்கு ஹர்திக் சரியானவர். எனவே அடுத்த டி20 தொடருக்கு முன்னதாக தேர்வாளர்கள் ஹர்திக்கை சந்தித்து இந்திய அணியின் கேப்டனாக அதிகாரப்பூர்வமாக அறிவிப்பார்கள்” என்று பிசிசிஐயின் உயர்மட்ட வட்டாரம் உறுதிப்படுத்தியுள்ளது.
இதற்கிடையில் முன்னாள் பயிற்சியாளர் ரவி சாஸ்திரி, இடைக்கால பயிற்சியாளர் விவிஎஸ் லட்சுமண் ஆகியோர் ஹர்திக்பாண்டியா கேப்டன் ஆவதற்கு ஆதரவு தெரிவித்துள்ளனர். டி20 உலகக்கோப்பையில் இருந்து இந்தியா இக்கட்டான முறையில் வெளியேறிய பிறகு டி20க்கான புதிய கேப்டனை அடையாளம் காண்பதில் எந்தத் தீங்கும் இல்லை. ரோஹித் ஏற்கனவே டெஸ்ட் மற்றும் ஒருநாள் போட்டிகளில் முன்னணியில் இருந்தால், புதிய டி 20 கேப்டனை அடையாளம் காண்பதில் தவறு இல்லை. அவருடைய பெயர் ஹர்திக் பாண்டியாவாக இருந்தால், அப்படி இருக்கட்டும், ”என்று ரவி சாஸ்திரி கூறினார்.
டி20 கேப்டனாகிறார் ஹர்திக்; பிசிசிஐ திட்டவட்டம்
04:49 pm Nov 18, 2022 |
