சென்னை: நூறாண்டுகளை கண்டுள்ள அவரது நினைவாற்றல் இன்றும் என்னை வியக்க வைக்கிறது என முதலமைச்சர் மு.க.ஸ்டாலின் தனது மாமா தட்சிணாமூர்த்திக்கு டிவிட்டரில் வாழ்த்து தெரிவித்துள்ளார். இதுதொடர்பாக அவர் வெளியிட்ட டிவிட்டர் பதிவில் கூறியுள்ளதாவது: எனது தாய் மாமாவும் கழகப் பற்றாளருமான தட்சிணாமூர்த்தி அவர்களைத் தொலைபேசியில் தொடர்புகொண்டு அவருக்கு 100வது பிறந்தநாள் வாழ்த்துக்களைத் தெரிவித்தேன்.
திருவாரூர் மாவட்டத்தில் எப்போது நான் சுற்றுப்பயணம் சென்றாலும், என் மீது மிகுந்த பாசமும், பற்றும் கொண்ட அவரைச் சந்தித்து நலம் விசாரிப்பேன். அவரும் நான் செல்லும் இடங்களுக்கு எல்லாம் வந்து என்னை நலம் விசாரிப்பார். தனது வாழ்நாளில் நூறாண்டுகளைக் கண்டுள்ள அவரது நினைவாற்றல் இன்றும் என்னை வியக்க வைக்கிறது.
அந்த அளவிற்கு நடப்பு விவரங்களை விரல் நுனியில் வைத்து என்னைச் சந்திக்கும் நேரங்களில் பேசுவார். அவரது நூறாவது பிறந்தநாளில், அவருக்கு நெஞ்சார்ந்த வாழ்த்துகளைத் தெரிவித்துக் கொள்வதுடன், அவர் நல்ல உடல்நலனுடன் எங்களோடு மேலும் பல்லாண்டு பயணித்திட இதயபூர்வமாக வாழ்த்துகிறேன். இவ்வாறு முதல்வர் பதிவிட்டுள்ளார்.
100வது பிறந்த நாள் காணும் தட்சிணாமூர்த்திக்கு முதல்வர் வாழ்த்து
12:50 am Nov 14, 2022 |
