அயர்லாந்து அணியுடன் நடந்த உலக கோப்பை டி20 முதல் சுற்று லீக் ஆட்டத்தில், ஜிம்பாப்வே அணி 31 ரன் வித்தியாசத்தில் வெற்றியை வசப்படுத்தியது. ஹோபர்ட்டில் நடந்த இப்போட்டியில், டாஸ் வென்ற அயரலாந்து முதலில் பந்துவீச... ஜிம்பாப்வே 20 ஓவரில் 7 விக்கெட் இழப்புக்கு 174 ரன் குவித்தது. அதிரடியாக விளையாடிய சிக்கந்தர் ராசா 82 ரன் (48 பந்து, 5 பவுண்டரி, 5 சிக்சர்) விளாசினார். வெஸ்லி 22, ஷான் வில்லியம்ஸ் 12, மில்டன் 16, லூக் ஜாங்வி 20* ரன் எடுத்தனர்.
அடுத்து களமிறங்கிய அயர்லாந்து 20 ஓவரில் 9 விக்கெட் இழப்புக்கு 143 ரன் எடுத்து தோற்றது. கர்டிஸ் கேம்பர் 27, டாக்ரெல், டெலானி தலா 24 ரன், மெக்கார்தி 22* ரன் எடுக்க, மற்ற வீரர்கள் கணிசமாக ரன் குவிக்கத் தவறினர். ஜிம்பாப்வே பந்துவீச்சில் முஸரபானி 3, ரிச்சர்ட், சதாரா தலா 2, வில்லியம்ஸ், சிக்கந்தர் தலா 1 விக்கெட் வீழ்த்தினர். சிக்கந்தர் ஆட்ட நாயகன் விருது பெற்றார். ஜிம்பாப்வே அணி 2 புள்ளிகள் பெற்றது.